कोल्हापुरात 'मविआ'च्या विजयानंतर राजू शेट्टी म्हणाले, उत्तरचा विजय...

पुणे : कोल्हापूर (Kolhapur) उत्तर निवडणूकीचा आज निकाल जाहिर झाला. यात महाविकास आघाडीचा विजय तर भाजपाचा पराभव झाला. या निकालावर राजकिय नेत्यांनी प्रतिक्रिया देण्यास सुरुवात केली आहे. दरम्यान स्वाभिमानी शेतकरी पक्षाचे नेते राजू शेट्टी (Raju Shetti) यांनी या विजयावर नाराजी व्यक्त केली आहे. हा विजय जनतेचा कौल वगैरे काही नाही. आमची या निवडणूकीत भूमिकाच नव्हती असे वक्तव्य राजू शेट्टी यांनी पुण्यात पत्रकार परिषदेत केले आहे.

यावेळी बोलताना राजू शेट्टी म्हणाले, सध्या राज्यात नागरिकांच्या हिताच्या मुद्द्यांकडे दुर्लक्ष करत राजकारण सुरू आहे. महागाईमुळे सामान्य लोक त्रस्त आहेत. शेती मालाला भाव नाही, योग्य नियोजन नाही, डाळी, तेल प्रचंड महागले आहे. वीज, शेती विद्यार्थी बेरोजगारी, इंधन दरवाढ याकडे दुर्लक्ष केले जात आहे. तर दुसरीकडे राज्यात भोंग्यावरून पातळीहीन राजकारण सुरू असल्याचे ते म्हणाले.

स्वाभिमानी शेतकरी संघटना सरकारमधून बाहेर पडली यासंदर्भात बोलताना ते म्हणाले,केंद्र व राज्य सरकारने शेतकऱ्यांचा घात केला. त्यांच्याकडून शेतकऱ्यांचे कसलेही भले होणार नाही याची खात्री पटली आहे. आता राज्यात शेतकऱ्यांचा दबावगट तयार करणार आहे. आम्ही तयार केलेले आमदार आम्हाला सोडून जातात ज्यांना जायचे आहे त्यांनी जावे, अशा गद्दारांना बरोबर ठेवून कधीच काम करणार नाही असा इशाराही त्यांनी यावेळी दिला.