Kolhapur Rain Flood Update : तावडे हॉटेल परिसरातील नागरिकांना हलवले, पंचगंगा नदीने इशारा पातळी ओलांडली

कोल्हापूर : शहरात पावसाचा जोर कमी असला तरी पंचगंगा नदीने इशारा पातळी ओलांडल्याने महापालिका प्रशासनाने आज तावडे हॉटेल येथील विक्रेत्यांच्या ३६ झोपड्यांमधील १५० हून अधिक नागरिकांना हलवले.

पुराचे पाणी गायकवाड वाड्याच्या पुढे आल्याने शिवाजी पूल ते गंगावेश रस्ता प्रशासनाने बंद केला. आज सकाळपासून शहरात पावसाचा जोर कमी होता. पण, पंचगंगा नदीच्या पाणी पातळीत वाढ होत आहे. त्यामुळे तावडे हॉटेल परिसरातील कमानीजवळ पाणी वाढले.

त्या परिसरात विविध वस्तूंची विक्री करणाऱ्या फिरस्त्यांच्या झोपड्या आहेत. इशारा पातळीवर पाणी गेल्यानंतर त्या परिसरात पुराचे पाणी येण्याची शक्यता आहे. त्यामुळे कालपासून अग्निशमन दलाचे जवान तेथील झोपडपट्टीधारकांना हलवण्याच्या प्रयत्नात होते.

आज सकाळपासून त्या सर्वांना स्थलांतरित होण्याची सूचना केली. त्यानंतर वाहने आणून त्यात साहित्य भरून घेऊन जाऊ लागले. महापालिकेच्या यंत्रणेनेही त्यांना काही वाहने दिली. ३६ हून अधिक झोपड्यांमध्ये असलेले १५० हून अधिक नागरिक पेठवडगाव व कागल परिसरातील त्यांच्या वसाहतीमध्ये स्थलांतरित झाले.

या वेळी अतिरिक्त आयुक्त केशव जाधव, उपशहर अभियंता रमेश कांबळे, मुख्य अग्निशमन अधिकारी मनीष रणभिसे तसेच अन्य अधिकारी, कर्मचारी उपस्थित होते.

शहरात १८ ठिकाणी पुराचे पाणी येते. अतिरिक्त आयुक्त रविकांत आडसूळ व केशव जाधव यांच्या मार्गदर्शनाखाली काम केले जात असून, चार विभागीय कार्यालयाअंतर्गत नागरिकांसाठीची स्थलांतरितांची ठिकाणे तयार ठेवली आहेत.

उपायुक्त शिल्पा दरेकर, साधना पाटील, शहर अभियंता हर्षजित घाटगे यांनी विभागीय कार्यालयांच्या क्षेत्रातील अशा ठिकाणांची पाहणी केली. स्थलांतरित ठिकाणी येणाऱ्या नागरिकांच्या भोजनाची, चहा-नाष्ट्याची व्यवस्था केली आहे. स्वतंत्र अधिकारी, कर्मचारी नेमले आहेत. वैद्यकीय यंत्रणा सज्ज असून औषध साठा केला आहे. तसेच वैद्यकीय तपासणीसाठी स्वतंत्र वैद्यकीय पथके तयार केली आहेत.

वर्षा पर्यटनासाठी गर्दी

सुटी असल्याने पंचगंगा नदीच्या पुराचे पाणी तसेच रंकाळा तलावावर वर्षा पर्यटनाचा आनंद लुटण्यासाठी नागरिकांनी गर्दी केली होती. शिवाजी पुलाजवळ पोलिस उत्साही नागरिकांना सूचना देत होते. पावसाने सायंकाळी उघडीप दिली असल्याने रंकाळ्यावर भाजलेली कणसे खात सेल्फी घेताना नागरिक दिसत होते.