कोल्हापूर : शिक्षक बँकेसाठी तिरंगी लढत

कोल्हापूर : प्राथमिक शिक्षक बँकेसाठी सत्तारूढ शिक्षक संघाच्या वरुटे पॅनेलविरुद्ध शिक्षक समिती व थोरात गट संघ यांचे राजर्षी शाहू स्वाभिमानी शिक्षक पॅनेल व पुरोगामी संघटनेचे आपलं पुरोगामी समविचारी परिवर्तन पॅनेलमध्ये सामना रंगणार आहे.

संघाचे राज्याध्यक्ष राजाराम वरुटे यांची १३ वर्षांपासून बँकेत सत्ता आहे. त्यांनी बहुतांश नवीन कार्यकर्त्यांना रिंगणात उतरविले आहे. त्यांनी आजी-माजी संचालकांना बरोबर ठेवण्यात यश मिळविले. वरुटे गटात कोणीही बंडखोरी केली नाही. सत्तारूढ गटाने आपले उमेदवार निवडणुकीपूर्वी जाहीर केल्याने त्यांनी प्रचार सुरू केला आहे.

शिक्षक समिती व थोरात गट शिक्षक संघाने युती करून राजर्षी श्री शाहू स्वाभिमानी शिक्षक पॅनेल जाहीर केले. पॅनेलमध्ये कास्ट्राईब संघटना, डीसीपीएस संघटना व शिक्षक भारती यांनाही प्रत्येकी एक जागा दिली आहे. समिती व थोरात गटाने प्रत्येकी सात जागांवर उमेदवार उभे केले आहेत. इतर संघटनांसह पॅनेल केले आहे.

पुरोगामी संघटनेचे प्रसाद पाटील यांनी विरोधी गटांशी जागा वाटपात समझोता न झाल्याने आपलं पुरोगामी समविचारी परिवर्तन पॅनेल जाहीर केले. त्यांना थोरात गटाचे माजी संचालक सुरेश कांबळे यांची साथ लाभली. गडहिंग्लज, भुदरगड व गगनबावडा तालुक्यातील इच्छुक उमेदवार मिळाले. शिक्षक सेना, अखिल महाराष्ट्र शिक्षक संघ यांनाही उमेदवारी दिली. त्यामुळे हे तिसरे पॅनेलही भक्कम झाले आहे.

सत्तारूढ गटाने सर्वांना विश्वासात घेऊन उमेदवार ठरविले. तालुका कार्यकारिणीने निवडलेल्या प्रामाणिक कार्यकर्त्यांना उमेदवारी दिली आहे. सत्तारूढ गटात एकानेही बंडखोरी केलेली नाही. आजी-माजी संचालक प्रचारात आहेत. त्यामुळे आमचा विजय निश्चित आहे.

- राजाराम वरुटे, सत्तारूढ शिक्षक संघ पॅनेलप्रमुख

डीसीपीएस, कास्ट्राईब व शिक्षक भारती या संघटनांना उमेदवारी दिल्याने पॅनेल मजबूत झाले आहे. जुन्या व नव्याचा मेळ घालून पॅनेल परिपूर्ण केल्याने आमचा विजय

निश्चित आहे.

- जोतिराम पाटील, समन्वयक, राजर्षी शाहू स्वाभिमानी शिक्षक पॅनेल

पुरोगामीवर विश्वास ठेवून शिक्षक समिती, थोरात गट, प्रहार व शिक्षक सेना यांच्यातील प्रमुख शिलेदारांनी पॅनेलची उमेदवारी स्वीकारली आहे. त्यामुळे परिवर्तन पॅनेल भक्कम झाले. त्यामुळे आमचा विजय निश्चित आहे.

- प्रसाद पाटील, पॅनेलप्रमुख, आपलं पुरोगामी समविचारी परिवर्तन पॅनेल