Kolhapur Traffic Control : वाहतूक नियंत्रण शाखेवर अधीक्षकांची करडी नजर;शहरातील फिक्स पॉईंट २० वरून ६० वर

कोल्हापूर : शहर वाहतूक नियंत्रण शाखेतील पोलिसांवर पोलिस अधीक्षकांची करडी नजर राहणार आहे. प्रत्येक पोलिसाला सकाळी साडेनऊला आणि दोन ते तीन दुपारची सुटी झाल्यानंतर सव्वातीन वाजता रस्त्यावर उभे राहिले पाहिजे, अशा सक्त सूचना त्यांनी दिल्या आहेत. तसेच फिक्स पॉईंटची संख्या २० वरून ६० केली आहे.

वाहतूक शाखेचे पोलिस वेळेवर ड्युटीच्या ठिकाणी जात नाहीत, अनेक वेळा फिरतीवर अधिक असतात. अनपेड कारवाईवर भर दिला जातो, अशा अनेक बाबींचा विचार करून अधीक्षक महेंद्र पंडित यांनी वाहतूक शाखेत अनेक बदल केले आहेत. अनेक गर्दीच्या ठिकाणी कायमस्वरूपी पोलिस नव्हता.

त्यामुळे फिक्स पॉईंटची संख्या आता २० वरून थेट ६० पर्यंत वाढविली आहे. त्यामुळे शहरातील गर्दीच्या प्रत्येक ठिकाणी पोलिस थांबून असणार आहे. अनेकवेळा साडेदहा-अकरा वाजले तरीही पोलिस रस्त्यावर दिसत नव्हते. त्यामुळे आता साडेनऊ वाजता पॉईंटवर जाण्याची सक्ती अधीक्षक पंडित यांनी केली आहे. पूर्वी अनपेड गुन्हे १०० पैकी २० होत होते, आता ते ५० ते ६० टक्क्यांपर्यंत पोहोचले आहेत. कंपनीने दिलेला सायलेन्सर बदलून दुसरा अधिक आवाजाचा बसविणाऱ्यांवरही कारवाई केली जात आहेत. आतापर्यंत शंभराहून अधिक सायलेन्सर वाहतूक शाखेच्या पोलिसांनी जप्त केले आहेत.

अल्पवयीन आढळल्यास कारवाई

अल्पवयीन मुले वाहन चालवत असल्यास त्यांच्या पालकांवर कारवाई केली जात आहे. कोल्हापूर आणि इचलकरंजी दोन्ही शहरांमध्ये अशा पद्धतीची कारवाई होत आहे. शहर वाहतूक नियंत्रण शाखेकडून योग्य ती कारवाई करण्याबाबत सूचना दिल्या आहेत. पोलिस कर्मचाऱ्यांपासून सूचना सुरू केल्या आहेत. त्यामुळे वाहतूकीला शिस्त लागेल, असा विश्‍वास पोलिस अधीक्षक महेंद्र पंडित यांना आहे.