धक्कादायक! विद्यापीठ वसतिगृहातील मेसच्या जेवणात आढळल्या अळ्या; विद्यार्थ्यांच्या आरोग्याचा प्रश्न ऐरणीवर!

कोल्हापूर : येथील शिवाजी विद्यापीठातील (Shivaji University Kolhapur) मुलांचे वसतिगृह क्रमांक 1 मधील (Boys Hostel No.1) मेसच्या जेवणात अळ्या आढळल्याचा धक्कादायक प्रकार उघडकीस आला आहे. काल जेवणावेळी वरणात अळ्या आढळून आल्याचा प्रकार समोर आला आहे.

दरम्यान, विद्यार्थ्यांनी निकृष्ट जेवणाचा पंचनामा केला. तसेच जेवणात अळ्या आढळण्याचे प्रकार वारंवार घडत असल्याचे विद्यार्थ्यांनी म्हटले आहे. या संदर्भात रेक्टरसह विद्यापीठ प्रशासनाला (University Administration) निवेदनपत्र देऊनही दखल घेतली जात नसल्याचे विद्यार्थ्यांनी सांगितले.

या प्रकारामुळे वसतिगृहातील 200 हून अधिक विद्यार्थ्यांच्या आरोग्याचा प्रश्न ऐरणीवर आला आहे. 4 व 5 सप्टेंबर रोजी सलग दोन दिवस भात आणि वरणामध्ये अळ्या आढळल्या. पुन्हा विद्यार्थ्यांनी रेक्टर यांना पत्र दिले; पण प्रशासनाने याकडे दुर्लक्ष केल्याचा विद्यार्थ्यांनी आरोप केला आहे.