कोल्हापूर : ‘लॉकअप’विना पोलिसांची तारांबळ

कोल्हापूर : जिल्ह्यातील मोजक्याच पोलिस ठाण्यांत ‘लॉकअप’ची सुविधा उपलब्ध आहे. गुन्ह्यांच्या तपासासाठी ताब्यात घेतलेल्या संशयितांना सुरक्षित लॉकअप मिळवताना पोलिसांना कसरत करावी लागते. यात त्यांचे श्रम व वेळ खर्च होतो. शहरासह जिल्ह्यात वाढत्या लोकसंख्येबरोबर गुन्ह्यांचे प्रमाणही वाढू लागले आहे. कायदा सुव्यवस्थेसह गुन्ह्यांवर अंकुश ठेवण्यासाठी टप्प्याटप्प्याने पोलिस ठाण्यांची संख्या वाढली. आज जिल्ह्यात ३१ पोलिस ठाणी आहेत. पण त्यापैकी आठच ठाण्यांत लॉकअपची सुविधा आहे.

पोलिस गुन्ह्यांच्या तपासात संशयितांना ताब्यात घेतात. त्यांच्याकडे चौकशी करून त्यांना पुरावे गोळा करायचे असतात. त्यांची वैद्यकीय तपासणी करावी लागते. त्यांना न्यायालयात हजर करावे लागते. सुरक्षिततेच्या दृष्टीने संशयिताला लॉकअपमध्ये ठेवावे लागते. ते लॉकअप संबंधित पोलिस ठाण्यात असेल, तर प्रश्नच मिटतो. पण ठाण्यात लॉकअप नसेल तर पोलिसांची तारांबळ उडते. अटकेची कारवाई केल्याबरोबर त्यांच्याकडून जवळच्या पोलिस ठाण्यात लॉकअपची शोधाशोध सुरू होते. ‘अमूक पोलिस ठाण्यातून बोलतोय, गुन्ह्यातील दोन-चार संशयित आहेत. तुमच्या लॉकअपला पाठवतो.’ अशी फोनवरून त्यांच्याकडून विचारणा सुरू होते. मात्र, समोरून ‘आधीच आमचे लॉकअप फुल्ल आहे.’ असे उत्तर आले तर आणखी अडचणी वाढतात. त्यांना पुन्हा दुसऱ्या जवळच्या लॉकअप असलेल्या पोलिस ठाण्याचा पर्याय शोधावा लागतो.

शहर परिसरात राजारामपुरी व गांधीनगर या दोनच पोलिस ठाण्यांत लॉकअप सुविधा आहे. दुसऱ्या पोलिस ठाण्याच्या लॉकअपमध्ये संशयितांना ठेवणे, त्याना पुन्हा ठाण्यात आणून चौकशी करणे, त्यांची वैद्यकीय तपासणी करणे, न्यायालयात हजर करणे आदी गोष्टी करताना वेळ, श्रम, वाहतूक खर्चासह सुरक्षिततेचाही प्रश्न निर्माण होतो. त्यामुळे प्रत्येक पोलिस ठाण्यात सुरक्षित लॉकअपची सुविधा गरजेची बनली आहे.

आठ ठाण्यांत सोय

जिल्ह्यातील आठ पोलिस ठाण्यांत लॉकअपची सुविधा आहे. शहरातील राजारामपुरीसह गांधीनगर, इचलकरंजी, शाहूवाडी, जयसिंगपूर, कागल, शिरोळ, चंदगड आदी पोलिस ठाण्यांचा यात समावेश आहे.

दृष्टिक्षेपात...

• जिल्ह्यातील पोलिस ठाणी ३१

• पोलिस अधिकारी १५९

• पोलिस कर्मचारी २७६२