विधवा प्रथा बंदीनंतर माणगाव ग्रामपंचायतीचा आणखी एक अनोखा उपक्रम; आता मुलीच्या लग्नात देणार 'संसारोपयोगी साहित्य'

रुकडी : माणगाव (ता. हातकणंगले) येथील ग्रामपंचायतीने (Mangaon Gram Panchayat) ‘लेक लाडकी माझ्या गावची’ या योजनेअंतर्गत एक अनोखा उपक्रम सुरू केला आहे. गावातून लग्न होऊन सासरी जाणाऱ्या मुलीसाठी (Girl) संसार उपयोगी साहित्य देण्याचा निर्णय घेतला आहे.

ग्रामपंचायतीच्या मासिक सभेमध्ये याबाबत निर्णय झाला असून या‌ नावीन्यपूर्ण योजनेची सुरुवात स्त्री मुक्तीच्या प्रणेत्या क्रांतिज्योती सावित्रीबाई फुले यांच्या जयंतीपासून होणार आहे, अशी माहिती सरपंच राजू मगदूम यांनी दिली.

राज्यात विविध ऐतिहासिक योजना राबविणारी ग्रामपंचायत म्हणून नावलौकिक असलेल्या माणगाव ग्रामपंचायतीने ‘लेक लाडकी माझ्या गावची’ या योजनेंतर्गत  संसारउपयोगी साहित्य देण्याचा निर्णय घेतला आहे. दरवर्षी गावातील एकूण सरासरी २५ मुलींची लग्ने होतात. एका मुलीकरिता अकरा हजार रुपये खर्च आहे. एकूण दोन लाख पंच्याहत्तर हजार रुपये इतका खर्च अपेक्षित आहे. मुलगीचे लग्नावेळचे वय १८ वर्षे पूर्ण असणे बंधनकारक आहे व अर्जासोबत जन्म दाखला किंवा वयाचा पुरावा जोडणे बंधनकारक आहे.

लग्न ठरल्यानंतर ग्रामपंचायतीस रितसर अर्ज करून या योजनेचा लाभ मिळावा, अशी मागणी मुलीच्या आई- वडिलांनी करायची आहे. संसारोपयोगी साहित्यामध्ये या गोष्टींचा समावेश संसारोपयोगी साहित्यामध्ये मिक्सर, कुकर, स्टील फिल्टर, पिंप, ताट, वाटी, पेले, तांब्या, कढई, झारा, पातेली, ईडली पात्र, बादली, घागर, सांडशी, उलतने, पळी, भातवाडी, बरणी, किटली, प्लेट, चमचे, टिफिन डबा, भांड्याचा रॅक, डबे, लाकडी पाट, इस्त्री, कुटुंबसंवर्धन पुस्तिका संच देणार आहे.

पदाधिकारी देणार मानधन

सरपंच व उपसरपंचांसह ग्रामपंचायत सदस्य यांना मिळणारे मानधन ‌यासाठी देण्यात येणार असून, ग्रामपंचायत फंडातून दोन लाख रुपयांची तरतूद करण्यात ‌येणार आहे. योजनेच्या लाभासाठी‌ मुलीचे आई- वडील  गावचे रहिवासी असणे बंधनकारक आहे, अशी माहिती उपसरपंच अख्तर भालदार यांनी दिली.