Maratha Reservation : कोल्हापुरात आढळल्या तब्बल 5,566 कुणबी नोंदी; मुश्रीफांच्या कागलमध्ये सर्वाधिक, जाणून घ्या किती नोंदी?

कोल्हापूर : राज्यात मराठा समाजाच्या (Maratha Community) कुणबीच्या (Kunbi) नोंदी तपासण्याचे काम सुरू आहे. येथे जिल्हा प्रशासनाकडे आत्तापर्यंत विविध विभागांतील ५ हजार ५६६ नोंदी मिळाल्या असल्याची माहिती जिल्हा प्रशासनाने जिल्हा माहिती कार्यालयाकडून दिली आहे.

सर्वाधिक ११८५ नोंदी कागल तहसील कार्यालयाकडून (Kagal Tehsil Office) नोंद झाल्या आहेत. राज्य सरकारने नेमलेल्या समितीच्या पहिल्या अहवालाच्या अनुषंगाने जिल्हाधिकारी राहुल रेखावार आणि निवासी उपजिल्हाधिकारी संतोष तेली यांच्या मार्गदर्शनाखाली अभिलेख शोधण्याचे काम वेगाने सुरू आहे. यासाठी स्वतंत्र कक्ष स्थापन केला आहे.

त्यातील नियुक्त अधिकारी आणि कर्मचाऱ्यांनी कुणबी नोंदीला प्राधान्य देण्याच्या सूचना प्रशासनाने दिल्या आहे. दरम्यान, जेवढ्या जास्ती-जास्त नोंदी मिळणार आहेत, तेवढ्या प्रमाणात कुणबी दाखले देण्यास मदत होणार आहे. ही मोहीम सरकारची पुढील सूचना येईपर्यंत सुरू राहणार आहे. तोपर्यंत तालुका पातळीवर विविध विभागांतर्गत कुणबी नोंदीचा शोध घेतला जात आहे.