'कुटुंबीयांना तुरुंगात घालण्याची स्वप्नं बघणाऱ्या दुष्ट प्रवृत्तीला हद्दपार करा'; हसन मुश्रीफांचा कोणावर रोख?

मुंबई : एका बाजूला संपूर्ण आयुष्य जनतेसाठी खर्ची घालणारा मी आणि दुसऱ्या बाजूला राजकीय हव्यासापोटी विरोधकांना आणि त्यांच्या कुटुंबीयांना तुरुंगात घालण्याची स्वप्ने बघणारी दुष्ट प्रवृत्ती, अशी ही लढाई आहे. या सगळ्यांचा विचार आणि तुलना तुम्हीच करा आणि अशा दुष्ट प्रवृत्तीला हद्दपार करा, असे आवाहन वैद्यकीय शिक्षण विशेष साहाय्य मंत्री हसन मुश्रीफ (Hasan Mushrif) यांनी केले.

मुंबईत आयोजित कागल मतदारसंघातील (Kagal Constituency) ग्रामस्थांच्या स्नेहमेळाव्यात ते बोलत होते. मुंबईकर ग्रामस्थांच्यावतीने पांडुरंग शेट्टी, अरुण पाटील, अमृत साळोखे, दत्तात्रय जाधव यांनी कार्यक्रमाचे संयोजन केले होते.

मुश्रीफ म्हणाले, ‘गेली ३५-४० वर्षे अव्याहत माझी जनसेवा सुरू असते. संपूर्ण आयुष्यात कधीच गट-तट, जात -धर्म पाहिला नाही. दुसऱ्या बाजूला राजकीय स्वार्थापोटी विरोधकांना तुरुंगात घालणारी षड्‍यंत्री प्रवृत्ती. तसेच निराधारांच्या योजनेची चौकशी लावून गोरगरिबांच्या संसारात पाणी ओतणारी वृत्ती, बांधकाम कामगारांच्या नोंदण्या बंद करणारा, एमआयडीसीतील कंपन्या बंद पडणारा, दूध संघ विकून मोडून टाकणारा, मागासवर्गीयांच्या जमिनी काढून घेणारा, अशा दुष्ट प्रवृत्तींशी ही लढाई आहे.’

यावेळी शेतकरी संघाचे अध्यक्ष प्रवीणसिंह पाटील, ‘गोकुळ’चे संचालक अंबरिशसिंह घाटगे यांची भाषणे झाली. मेळाव्याला केडीसीसी बँकेचे संचालक प्रताप उर्फ भैया माने, मुंबई जिल्हा मध्यवर्ती बँकेचे संचालक विठ्ठलराव भोसले, वसंतराव धुरे, सतीश पाटील, शशिकांत खोत, बाळासाहेब तुरंबे, दत्ता पाटील, कृष्णात मेटील, सूर्यकांत पाटील, सौ. शीतल फराकटे, काशिनाथ तेली, डी. एम. चौगुले, अंकुश पाटील, शिरीष देसाई, दीपक देसाई, आदी प्रमुख उपस्थित होते.

हार-फुलांचा ढीग

हसन मुश्रीफ यांना शुभेच्छा देण्यासाठी मुंबईकर ग्रामस्थांनी वैयक्तिक सत्कार आणि ग्रामस्थ मंडळ यांच्या वतीने सत्कार यांच्या माध्यमातून प्रचंड गर्दी केली होती. मेळाव्याच्या ठिकाणी अक्षरशः फुले, पुष्पहार आणि पुष्पगुच्छ यांचा ढग पडला होता. पाच हजारांहून अधिक मुंबईकर ग्रामस्थांच्या उपस्थितीमुळे मुश्रीफही भारावले.