हृदयद्रावक : बाळाचा त्रास बघवत नसल्याने आईनेच पोटच्या गोळ्याला पाण्याच्या टाकीत बुडवून मारले

भिलवडी (सांगली) : माळवाडी (ता. पलूस) येथे जन्मदात्या मातेनेच आपल्या १३ दिवसांच्या नवजात बालकास पाण्यात बुडवून मारले. ऐश्वर्या अमितकुमार माळी (वय २२, रा. कवलापूर, ता. मिरज) असे त्या आईचे नाव आहे.

 
याबाबत पोलिसांनी दिलेली माहिती अशी,

 माळवाडी-वसगडे रस्त्यावरील पाटील मळ्यानजीक उत्तम धोंडिराम माळी यांचा साईदीप बंगला आहे. ते शेती करतात. त्यांची मुलगी ऐश्वर्या यांचे नात्यातील मुलाशी लग्न झाले. त्यांना पहिला मुलगा आहे. सांगलीतील खासगी दवाखान्यात दुसरे बाळंतपण झाले. जन्मानंतर दुसऱ्याच दिवशी या बाळावर शस्त्रक्रिया झाली. तरीही बाळाला त्रास सुरूच होता. पुन्हा शस्त्रक्रिया करण्याचा सल्ला डॉक्‍टरांनी दिला होता. बाळास होणारा त्रास न पहावल्याने मातेनेच हे अघोरी कृत्य केल्याचे तपासात रात्री उघड झाले. 

आज सकाळी घरातील सर्व मंडळी शेतात कामासाठी गेली होती. ऐश्वर्याची आई व वहिनी घराजवळच धुणे धूत होत्या. ऐश्वर्या घरात एकटीच होती. तिने सकाळी साडेनऊ वाजता बाळास दुसऱ्या मजल्यावरील प्लास्टिकच्या पाण्याच्या टाकीत बुडवले. त्यात बाळाचा गुदमरून मृत्यू झाला. खाली येऊन बाळ गायब झाल्याचा कांगावा केला. बंगल्याचे पाठीमागील दरवाजा उघडा ठेवला. यामुळे नातेवाईक व शेजारी गोळा झाले. 

हेही वाचा- घृणास्पद :  शिक्षकाकडूनच विद्यार्थिनीचा लैंगिक छळ -

भिलवडी ठाण्याचे सहायक निरीक्षक कैलास कोडग, उपनिरीक्षक विशाल जगताप यांनी पंचनामा केला. येथील प्राथमिक आरोग्य केंद्रात उत्तरीय तपासणी झाली. तासगावच्या पोलिस उपाधीक्षक अश्‍विनी शेंडगे यांनी घटनास्थळावर येऊन तपासाच्या सूचना दिल्या. तपासादरम्यान ऐश्‍वर्या हिनेच पोटच्या गोळ्याला बुडवून मारल्याचे निष्पन्न झाले.

संपादन - अर्चना बनगे