Bus Accident : चंदगड-गडहिंग्लज मार्गावर विचित्र अपघात; एसटीच्या धडकेत दुचाकीस्वार जागीच ठार, चार दहावीचे विद्यार्थी जखमी

चंदगड : चंदगड- गडहिंग्लज मार्गावर (Chandgad-Gadhinglaj Route) सातवणे (ता. चंदगड) गावच्या हद्दीत चाळोबा देवालयानजीक एसटी बस व दुचाकीस्वार यांच्यात झालेल्या अपघातात दुचाकीस्वार जागीच ठार झाला. बाळू तुकाराम साबळे (वय ५२, रा. सत्तेवाडी, ता. चंदगड) असे त्याचे नाव आहे.

तर, दुचाकीस्वाराला वाचवण्याच्या प्रयत्नात एसटी चालकाचा ताबा सुटून विरुद्ध बाजूला उभ्या असलेल्या चार विद्यार्थ्यांना धडक बसली. त्यात ते गंभीर जखमी झाले. शुभम संजय गावडे, सिद्धेश मारुती ढोकरे (दोघेही रा. सावर्डे), कुणाल कृष्णा कांबळे (कानडी), वैभव भरत कोंडुसकर (पोवाचीवाडी) हे दहावीचे विद्यार्थी गंभीर जखमी झाले.

ते नागनवाडी येथील धनंजय विद्यालयाचे विद्यार्थी आहेत. त्यांच्यावर बेळगाव येथील रुग्णालयात उपचार सुरू आहेत. काल सकाळी सव्वाआठच्या सुमारास हा अपघात झाला. याबाबत अधिक माहिती अशी, दोडामार्गहून चंदगडमार्गे कोल्हापूरला जाणारी बस (एमएच १४ बीटी ४२३१) चाळोबा देवालयानजीक आली असता दुचाकीस्वार साबळे अचानक समोरच्या जोड रस्त्यावरून थेट मुख्य रस्त्यावर आले. भरधाव एसटीचालकाचा अचानक उद्भवलेल्या प्रसंगामुळे ताबा सुटला.

दुचाकीस्वाराला वाचवण्यासाठी त्याने एसटी विरुद्ध दिशेला घेतली. मात्र वेगावर नियंत्रण ठेवता न आल्याने दुचाकीस्वाराला फरपटतच एसटी विरुद्ध दिशेला उभ्या असलेल्या विद्यार्थ्यांना जाऊन धडकली. यात दुचाकीस्वार जागीच ठार झाला. तर चार विद्यार्थी गंभीर जखमी झाले. त्यांना बेळगाव येथे उपचारासाठी हलवण्यात आले. त्यांची प्रकृती स्थिर असल्याचे सांगण्यात आले. मृत साबळे हे दौलत कारखान्यात नोकरीला होते. धडकेत दुचाकीचे मोठे नुकसान झाले.