Belgaum Crime : बहिणीच्या पतीला मेहुण्यानं धारदार शस्त्रानं भोसकलं; 'या' कारणावरून दोघांत प्रचंड वाद

चिक्कोडी : बहिणीच्या पतीचा मेहुण्याने खून केल्याची घटना शनिवारी संध्याकाळी उशिरा घडली. चिक्कोडी (Chikkodi) शहरातील विद्यानगरमध्ये ही थरारक घटना उघडकीस आली. ईरगौडा शिवपूत्र टोप्पगोळ (वय ४५ रा. जैनापूर, ता. चिक्कोडी) असे खून झालेल्याचे नाव आहे.

संजय विरूपाक्ष बकरे (वय ४३, रा. जैनापूर ता. चिक्कोडी) असे संशयित मारेकऱ्याचे नाव आहे. याबाबत माहिती अशी, ईरगौडा हे जैनापूरचे रहिवाशी असून कंत्राटदार व क्रश मालक आहे. मारेकरी व मृत दोघांचेही गाव एकच आहे. घरगुती कारणावरून यांच्यात वाद सुरू होता असे समजते.

त्याच कारणातून संजयने आपल्या बहिणीच्या पतीचा खून केल्याचे पोलिसांनी सांगितले. ईरगौडा हे सैन्य दलातून निवृत्त होऊन सध्या कंत्राटदार व क्रशर सुरू करून व्यवसायात उतरले आहेत. त्यांचे जैनापूर येथे व चिक्कोडी येथेही घर आहे. चिक्कोडी येथील घरात शनिवारी असताना संजयने येऊन त्यांच्यावर धारदार शस्त्रांनी हल्ला करून खून केला आहे.

यानंतर शेजाऱ्यांनी ईरगौडा यांना दवाखान्यात घेऊन जात असताना वाटेतच त्यांचा मृत्यू झाला. संशयित मारेकरी संजय याचेही गावात दुकान आहे. कोणत्या कारणाने चाकूने भोसकून खून करण्यात आला, याचा तपास सुरू असल्याचे पोलिसांनी सांगितले. घटनेची माहिती मिळताच चिक्कोडीचे मंडल पोलिस निरीक्षक विश्वनाथ चौगुले, उपनिरीक्षक बसनगौडा नेर्ली यांनी भेट देऊन पंचनामा केला. घटनेची नोंद चिक्कोडी पोलिसात झाली असून अधिक तपास सुरू असल्याचे पोलिसांनी सांगितले.