Ambabai Temple : भाविकांसाठी खुशखबर! आता अंबाबाई मंदिरापर्यंत विशेष शटल बस सेवा होणार सुरू

कोल्हापूर : पीएम ई-बस सेवा योजनेतून (PM E-Bus Seva Yojana) १०० ई-बस ताफ्यात दाखल झाल्यानंतर केएमटीतर्फे विविध पार्किंगच्या ठिकाणांहून अंबाबाई मंदिरापर्यंत (Ambabai Temple) विशेष शटल बस सेवा (Shuttle Bus Service) सुरू करण्यात येणार आहे. यासह विविध सुविधांसाठी तरतूद करत परिवहन उपक्रमाकडून सात लाख ५६ हजारांच्या शिलकीचे अंदाजपत्रक सादर करण्यात आले.

नवीन वर्षात ६४ कोटी ७१ लाख २२ हजार जमा आणि ६४ कोटी ६३ लाख ६६ हजार खर्च, असा ७ लाख ५६ हजारांच्या शिलकीचे अंदाजपत्रक सादर करण्यात आले. भांडवली जमा ३५ कोटी २९ लाख १० हजार व भांडवली खर्च ३५ कोटी २७ लाख २० हजार आहे. तसेच महापालिकेकडून महसुली खर्चासाठी अर्थसहाय्य म्हणून १९ कोटी अपेक्षित धरले आहेत.

हे अर्थसहाय्य मिळाले नाही, तर दैनंदिन कामकाजावर परिणाम होणार असल्याचे अंदाजपत्रकात मांडण्यात आले आहे. पीएम ई-बस सेवा योजनेंतर्गत ई बससाठी तरतूद केली आहे. नवीन वर्षात ताफ्यातील ८५ बसपैकी ७५ बसेस नऊ महिने कालावधीसाठी दैनंदिन सोडण्याचे नियोजन केले आहे. त्यानंतर १०० ई-बससह ११५ बस मार्गस्थ राहतील, असे अपेक्षित धरले आहे.

यापासून प्रवासी तिकीट विक्रीतून मिळालेले उत्पन्न, पे ॲण्ड पार्किंग, बसवरील जाहिरात आदी मार्गाने येणारे उत्पन्न महसुली जमेमध्ये धरण्यात आले आहे. नवीन ई-बस मार्गस्थ करणे, त्यासाठी पायाभूत सुविधांची उभारणी करणे, ॲपच्या माध्यमातून आयटीएमएस यंत्रणा कार्यान्वित करणे, पर्यटक-भाविकांसाठी विविध पार्किंगच्या ठिकाणांपासून अंबाबाई मंदिरापर्यंत विशेष शटल बस सेवा करणे, यासाठी आवश्यक तरतूद करण्यात आली आहे.

महसुली जमा (कोटी रुपयांत)

• वाहतूक ३२,३९,०९,०००

• पोषण सरचार्ज २४,१६,०००

• इतर बाबी ८,८७,४७,०००

• महानगरपालिका अर्थसहाय्य १९,००,००,०००

• पीएम ई-बस सेवा प्रकल्पांतर्गत

• प्रतिकिमीसाठी अनुदान ४,१४,००,०००

महसुली खर्च

• वेतन खर्च ३३,५०,३०,०००

• इंधन, बस देखभाल दुरुस्ती ३३,५०,३०,०००

• मनपा परतफेड, घसारा १,१२,५०,०००