शेळोशी-पखालेवाडी बंधाऱ्याची उंची वाढवावी

01767

शेळोशी-पखालेवाडी
बंधाऱ्याची उंची वाढवावी

गगनबावडा, ता. १५ : पाणी अडविणे व वाहतूक अशा दुहेरी हेतूने उपयोग होण्याच्या दृष्टीने धामणी नदीवर बांधकाम सुरू असलेल्या शेळोशी-पखालेवाडी दरम्यानच्या बंधाऱ्याची उंची वाढवावी, अशी मागणी जनतेतून होत आहे.
शेतीला पाणी अडविण्याच्या दृष्टीने धामणी नदीवर पूर्वीचे काही बंधारे आहेत. पण ते सध्या जीर्ण झाले आहेत. ते बंधारे असूनही येथील शेतकऱ्यांना उन्हाळ्यात मातीचे बंधारे घालावे लागतात. दरम्यान पाटबंधारे विभागातर्फे धामणी नदीवर नव्याने काही ठिकाणी बंधारे बांधणे सुरू आहे. कडवे-गारीवडे दरम्यान दोन वर्षांपूर्वी बंधारा बांधला आहे. नदीपात्रापेक्षा त्याची उंची कमी आहे. पावसाळ्यात हे बंधारे पाण्याखाली जातात. त्यावरून दुचाकीही वाहतूक करता येत नाही. पाणी अडविण्याव्यतिरिक्त त्याचा फारसा उपयोग होत नाही. गेल्या महिन्यापासून शेळोशी, डोंगळेवाडी ते पखालेवाडीदरम्यान धामणी नदीवर बंधाऱ्याचे काम सुरू आहे. या बंधाऱ्यामुळे गगनबावडा व राधानगरी तालुक्यांदरम्यानची वाहतूक सुरळीत होणार आहे. पावसाळ्यात बंधारे पाण्याखाली गेल्यामुळे कोनोली, पाटीलवाडी, कुपलेवाडी, कडवे, जरगी, म्हालदारवाडी, शेलारवाडी, शेळोशी इत्यादी गावांचा संपर्क तुटतो. पाणी अडविणे व वाहतूक अशा दुहेरी हेतूने बंधाऱ्याची पुरेशी उंची वाढवावी, अशी मागणी होत आहे.