Government School : 200 विद्यार्थी शिकत असलेल्या शाळेत तीन भिंती कोसळल्या; प्रार्थना सुरु असतानाच घडली दुर्घटना

खानापूर : तालुक्यातील इटगी ग्रामपंचायत (Itagi Gram Panchayat) कार्यक्षेत्रातील बेडरहट्टी गावातील सरकारी (Government school) उच्च प्राथमिक कन्नड शाळेच्या (Kannada School) तीन खोल्या शुक्रवारी (ता. २८) कोसळल्या. यावेळी शाळेतील विद्यार्थी मैदानात प्रार्थनेसाठी उभे होते.

त्यामुळे सुदैवानेच विद्यार्थी (Students) मोठ्या संकटातून बचावले. याबाबत अधिक माहिती अशी, या शाळेत पहिली-सातवीपर्यंत २१० विद्यार्थी शिकत आहेत. शुक्रवारी सकाळी विद्यार्थी प्रार्थना करत असताना तीन खोल्यांच्या भिंती आणि छत कोसळले. गेल्या आठवड्याभरापासून मुसळधार पाऊस सुरू आहे.

भिंती जीर्ण झाल्याची बाब शिक्षण खात्याच्या निदर्शनास आणूनही कोणतीच कार्यवाही झाली नव्हती. पण या घटनेत सुदैवाने कोणती दुर्घटना घडली नाही. त्यात काही बरे-वाईट झाले असते तर त्याला जबाबदार कोण, असा सवाल ग्रामस्थ करीत आहेत.

बेडरहट्टी शाळेच्या भिंती कोसळल्याचे वृत्त समजताच तहसीलदार प्रकाश गायकवाड, गटशिक्षणाधिकारी राजेश्वरी कुडची, क्षेत्र समन्वयक अप्पाण्णा अंबगी, ​​बीईओ कार्यालय निरीक्षक शंकर कम्मार, महसूल निरीक्षक एस. बी. टक्केकर, पंचायत राज विभागीय अभियंता डी. एम. बन्नुरे, पीडीओ वीरेश सज्जन, ग्राम प्रशासकीय अधिकारी एम. ए. जकाती व इतरांनी भेट देऊन शाळेच्या कोसळलेल्या खोल्यांची पाहणी केली.

एसडीएमसी अध्यक्ष अदृश्य दोडवाड यांनी, शाळेच्या खोल्यांची दूरवस्था झाली आहे. नुकत्याच बांधलेल्या तीन कॉंक्रिट खोल्या गळत आहेत. शाळेतील स्वयंपाकघराची खोलीही कोसळली आहे. त्यामुळे तात्काळ नवीन खोल्या बांधून द्याव्यात. जिल्हाधिकाऱ्यांच्या निर्देशानुसार मुलांच्या शिक्षणाकडे तातडीने लक्ष दिले जाईल, असे तहसीलदार प्रकाश गायकवाड यांनी सांगितले. यावेळी इराप्पा दोडमणी, गंगाप्पा बडली, विठ्ठल किलोजी, बसवराज तुरमरी उपस्थित होते.