प्रवाशांसाठी महत्त्वाची बातमी! 'हा' घाट ऑक्टोबरअखेर अवजड वाहतुकीसाठी राहणार बंद; जिल्हाधिकाऱ्यांचा मोठा निर्णय

कोल्हापूर : पावसाळ्यात अतिवृष्टी होऊन घाटातील रस्त्याच्या दोन्‍ही बाजूंचे संरक्षक कठडे कोसळून अपघात होण्याची शक्यता गृहीत धरून तिलारी घाटातील (Tilari Ghat) अवजड वाहनांची वाहतूक ३१ ऑक्टोबरअखेर बंद करण्याचे आदेश जिल्हाधिकारी अमोल येडगे (Collector Amol Yedge) यांनी काढले आहेत. दरम्यान, या मार्गाला पर्याय म्हणून आंबोली व बेळगाव जिल्ह्यातील चोर्ला घाटाचा (Amboli Chorla Ghat) पर्यायी म्हणून वापर करता येणार असल्याचे आदेशात म्हटले आहे.

चंदगड तालुक्यात तसेच तिलारी घाटामध्ये पावसाळ्यामध्ये अतिवृष्टी होत असल्याने घाटातील बऱ्याच ठिकाणी संरक्षक कठडे जीर्ण व नादुरुस्त अवस्थेत आहेत. त्यामुळे अपघात होण्याची शक्यता नाकारता येत नाही. घाटातून एसटी वाहतूकही सुरू आहे. त्यामुळे बसचा अपघात होऊन प्रवाशांचा जीव धोक्यात येऊ शकतो. असे संभाव्य धोके टाळण्यासाठी तिलारी घाटातून अवजड वाहतूक ३१ ऑक्टोबरअखेर बंद करण्यात येणार आहे.

तिलारी घाट अरुंद असल्याने घाटामध्ये वारंवार अपघात होतात. घाट अवजड वाहतुकीस धोकादायक असून, घाटातील तीव्र चढ-उतारामुळे वळणांवर वाहनधारकांची कसरत होते. त्यामुळे अनेक अपघात झाले आहेत. तीव्र वळणांवर वाहन अडकल्यास तेथेपर्यंत क्रेन नेणेसुध्दा अवघड होते. अशावेळी मोठ्या क्रेनचाही अपघात झाल्याच्या घटना घडल्या आहेत. गुगल मॅपवर बेळगावातून गोव्यास जाणारा जवळचा रस्ता म्हणून तिलारी घाट दिसतो. त्यामुळे वाहनचालक या मार्गाने जातात; पण घाटाचा अंदाज चालकाला येत नाही. त्यामुळे अपघात वा वाहने घाटामध्ये अडकून पडण्याच्या घटना घडतात. त्यामुळे हा निर्णय घेतला आहे.