Kolhapur Accident: कोल्हापुरात अपघात! अंबपवाडी रस्त्यावर स्कूल बस घसरली, सुदैवाने दुर्घटना टळली

घुणकी : अंबप-अंबपवाडी रस्त्यावर आज सायंकाळी पेठवडगाव येथील एका इंग्लिश मीडियम स्कूलची बस घसरली. शाळेचे विद्यार्थी सोडून परतताना ही घटना घडल्याने यात विद्यार्थी नव्हते. यामुळे दुर्दैवी घटना घडली नाही.

डोंगरे वस्तीजवळ स्कूल बस समोरून येणाऱ्या वाहनाला रस्ता देताना बाजूला घेतल्यानंतर नाल्यात घसरली. सुदैवाने यात मुले नव्हती.

या रस्त्यावर मागील काही दिवसांपासून अनेक वेळा नाल्यात वाहने घसरण्याच्या घटनेत वाढ होत आहे. काही दिवसांपूर्वीच शाळेची मुले घेऊन जाणारी मारुती व्हॅन, कोळशाचा ट्रक, दोन दिवसांपूर्वी वाळूचा डंपर, अशी वाहने घसरली आहेत. पावसामुळे रस्त्याच्या बाजूपट्ट्या कमजोर झाल्या आहेत. येथून अवजड वाहनांची वाहतूक सतत होत असते.