‘शक्तिपीठ’विरोधातील लढाईला सज्ज राहा
03746
वाघापूर : येथे शक्तिपीठ महामार्गाविरोधातील मेळाव्यात बोलताना माजी आमदार के. पी. पाटील. शेजारी माजी आमदार संजय घाटगे आदी.
.............
‘शक्तिपीठ’विरोधातील लढाईला सज्ज राहा
संजय घाटगे : वाघापुरात लढा तीव्र करण्याचा शेतकऱ्यांचा निर्धार
सकाळ वृत्तसेवा
गारगोटी, ता. २९ : ‘प्रस्तावित शक्तिपीठ महामार्ग शेतकऱ्यांना देशोधडीला लावणारा आहे. कोणतीही मागणी नसताना तो जनतेवर लादला जात आहे. याविरोधात रस्त्यावरच्या लढाईसाठी सज्ज राहा,’ असे आवाहन माजी आमदार संजय घाटगे यांनी केले.
शक्तिपीठ महामार्ग शेती बचाव कृती समितीच्या वतीने वाघापूर (ता. भुदरगड) येथे आयोजित निर्धार सभेत ते अध्यक्षस्थानवरून बोलत होते. सभेत शेतकऱ्यांनी हा लढा अधिक तीव्र करण्याचा निर्धार व्यक्त केला. माजी आमदार के. पी. पाटील प्रमुख उपस्थित होते. कृती समितीचे निमंत्रक सम्राट मोरे यांनी प्रास्ताविक केले.
माजी आमदार के. पी. पाटील म्हणाले, ‘८६ हजार कोटी रुपयांचा हा महामार्ग कशासाठी? त्यापेक्षा आहे त्या राज्यमार्गाचे रुंदीकरण करावे. भुदरगड तालुक्यातून कोकणात जाणाऱ्या शिवडाव घाटरस्त्याला गेल्या ५० वर्षांत मंजुरी मिळत नाही आणि या महामार्गाला लगेच मंजुरी कशी मिळते, हा प्रश्न आम्हाला पडला आहे. शेतकऱ्यांना देशोधडीला लावणाऱ्या या लढ्यात आम्ही सहभागी होणार आहोत.’
स्वाभिमानीचे प्रदेशाध्यक्ष डॉ. जालंदर पाटील म्हणाले, ‘शक्तिपीठ महामार्गासाठी २७ हजार एकर पिकाऊ जमीन जाणार आहे. तरीही शेतकऱ्यांचे प्रतिनिधित्व करतो असे म्हणणारे आमदार आणि खासदार या महामार्गाच्या विरोधातील लढ्यात सामील होत नाहीत याचे कारण काय? तर ठेकेदाराला पोसणारा आणि आमदार, खासदारांना कमिशन देणारा हा महामार्ग आहे. हे लोकप्रतिनिधी शेतकऱ्यांचे प्रतिनिधित्व करतात काय? याचा विचार करण्याची वेळ आली आहे.’
या वेळी शिवसेनेचे नेते विजय देवणे, संपत देसाई, धनाजी गुरव, रामचंद्र कळंबेकर, सचिन घोरपडे, प्रकाश पाटील, जीवन पाटील, म्हसवेचे सरपंच सर्जेराव देसाई, मच्छिंद्र मुगडे, के. के. भारतीय, शशिकांत वागरे, सचिन भांदिगरे, स्वप्निल साळुंखे यांच्यासह कागल, भुदरगड, आजरा तालुक्यांतील शेतकरी मोठ्या संख्येने उपस्थित होते.
.....
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.