Education Department: तर गंभीर परिणामास आपण जबाबदार राहाल.. शिक्षक आमदार आसगावकरांनी दिला आंदोलनाचा इशारा

सकाळ वृत्तसेवा
कोल्हापूर, ता. २३ ः शिक्षकांना शालार्थ आयडी मिळायला नको म्हणून अधिकारी जाणून-बुजून दिरंगाई करत आहेत. त्यांचा याबाबतचा निष्काळजीपणा भयंकर आहे. या आयडीचा प्रश्नी आमदार प्रा. जयंत आसगावकर यांनी सोमवार (ता. ३०) पासून पुणे येथील शिक्षण आयुक्तांच्या कार्यालयासमोर आंदोलन करण्याचा इशारा दिला आहे.

टप्पा अनुदानावरील शिक्षकांना लवकर शालार्थ आयडी मिळवून त्यांची यंदाची दिवाळी गोड हवी यासाठी पाठपुरावा सुरू आहे. मात्र शिक्षण विभागातील अधिकारी याप्रश्नी सकारात्मक नसल्याचे चित्र आहे. अधिकाऱ्यांच्याकडून याप्रश्नी चालढकल होत आहे. शिक्षण उपसंचालक श्रीराम पानझडे यांच्या उपस्थितीमध्ये झालेल्या १३ जूनच्या आढावा बैठकीत प्रलंबित शालार्थ आयडीचे प्रकरणे तीन आठवड्यात निकाली काढण्याचे ठरले होते. पण, शालार्थ आयडी देण्यास टाळाटाळ केली जात आहे. यामुळे आंदोलनाचा निर्णय घेतला आहे. आंदोलन काळात होणाऱ्या गंभीर परिणामास आपण जबाबदार राहाल असे पत्र आमदार आसगावकर यांनी शिक्षण आयुक्तांना पाठवले आहे.