पेपरमध्ये चुका, पुर्नपरीक्षा घ्या

लोगोः विद्यापीठ

पेपरमध्ये चुका, पुनर्परीक्षा घ्या
‘बी. टेक’च्या विद्यार्थ्यांची विद्यापीठाकडे मागणी

सकाळ वृत्तसेवा
कोल्हापूर, ता. ६ ः डिझाईन ऑफ काँक्रेट स्‍ट्रक्चर-सेकंड या विषयाच्या पेपरमधील प्रश्नांमध्ये चुका आणि विसंगती होत्या. त्यातील अनेक प्रश्न अनुत्तरीत होते. त्यामुळे पेपर सोडविता आला नाही. ते लक्षात घेऊन शिवाजी विद्यापीठाने या विषयाची पुनर्परीक्षा घ्यावी, अशी मागणी बी. टेक (सिव्हिल) अभ्यासक्रमाच्या अंतिम वर्षातील विद्यार्थ्यांनी केली आहे.
या मागणीचे निवेदन त्यांनी विद्यापीठाच्या परीक्षा व मूल्यमापन मंडळाचे संचालकांना पाठविले आहे. विद्यापीठातर्फे ३ मे रोजी सकाळी साडेदहा ते दुपारी दीड या वेळेत घेतलेल्या ‘डिझाईन ऑफ काँक्रेट स्‍ट्रक्चर-सेकंड’ या विषयाचा पेपर संख्यात्मक स्वरूपाचा होता. अचूक गणनेसाठी वैज्ञानिक कॅल्क्युलेटर वापरणे आवश्यक होते. मात्र, परीक्षेच्या मार्गदर्शक तत्त्वांमध्ये या कॅल्क्युलेटरच्या वापरासाठी उल्लेख नव्हता. पेपरमध्ये सादर केलेल्या संख्यात्मक समस्या सोडविण्यासाठी ते आवश्यक होते. पेपरमधील चुकांमुळे अनेक प्रश्न अनुत्तरित आहेत. परिणामी, आम्ही विद्यार्थी गोंधळून गेलो. त्यामुळे पेपर पुरेशा प्रमाणात सोडविता आला नाही. त्याचा विचार करून परीक्षा मंडळाने या विषयाची पुनर्परीक्षा घ्यावी, अशी मागणी केली.

चौकट
पेपर पूर्ण लिहू शकलो नाही
पेपर संख्यात्मक स्वरूपाचा असल्याने या परीक्षेसाठी किमान साडेतीन ते चार तासांचा वेळ देणे आवश्यक होते. मात्र, तीन तासांचा कालावधी दिल्याने आम्ही पेपर पूर्णपणे लिहू शकलो नसल्याचे विद्यार्थ्यांनी निवेदनात म्हटले आहे.
.....
कोट
या विद्यार्थ्यांचे निवेदन अद्याप परीक्षा मंडळाला मिळालेले नाही. ते मिळाल्यानंतर पेपर सेटर यांच्याकडून माहिती घेऊन पुढील कार्यवाही केली जाईल.
-डॉ. अजितसिंह जाधव, संचालक, परीक्षा व मूल्यमापन मंडळ