CM Eknath Shinde: मुख्यमंत्र्यांचा मध्यरात्री धावता कोल्हापूर दौरा, ‘विशाळगड’ची घेतली माहिती?

कोल्हापूर, ता. १४: अतिक्रमणावरून रविवारी विशाळगड प्रकरण तापलेले असतानाच मुख्यमंत्री एकनाथ शिंदे येथील विमानतळावर मध्यरात्री अचानक दाखल झाले. त्यांनी जिल्हाधिकारी अमोल येडगे व कोल्हापूर परिक्षेत्राचे विशेष पोलिस महानिरीक्षक सुनील फुलारी यांच्याकडून घटनाक्रमाची तसेच तेथील न्यायालयीन प्रकरणांची माहिती घेतली. त्यानंतर मुख्यमंत्र्यांनी अधिकाऱ्यांना काही सूचना केल्या.

cm eknath shinde visits kolhapur airport in midnight take information about vishalgad encrochment issue

आषाढी वारीतील सुविधांचा आढावा घेण्यासाठी मुख्यमंत्री शिंदे आज पंढरपूरला गेले होते. तेथील पाहणीनंतर हवामानामुळे त्यांनी अचानक कोल्हापूरला येण्याचा निर्णय घेतला. त्यानुसार मुख्यमंत्री शिंदे व कृषी मंत्री दादा भुसे मोटारीने कोल्हापूर विमानतळावर येण्यास निघाले. दोघेही मध्यरात्री एकच्या दरम्यान येथील विमानतळावर पोहोचले.

त्यावेळी त्यांना जिल्हाधिकारी अमोल येडगे, विशेष पोलिस महानिरीक्षक फुलारी यांनी विशाळगडवरील घटनांची माहिती दिली. तेथील काही न्यायालयीन प्रकरणांचीही माहिती दिली. त्यानंतर मुख्यमंत्र्यांनी अधिकाऱ्यांना काही सूचना दिल्याचे समजते. त्यानंतर ते विमानाने मुंबईला रवाना झाले.

मुख्यमंत्री अवघी वीस मिनिटे विमानतळावर होते. यावेळी वीरेंद्र मंडलिक व शिवसैनिक उपस्थित होते. त्यांच्या दौऱ्यात झालेल्या अचानक बदलामुळे प्रशासनाची धावपळ उडाली. सोमवारपासून अतिक्रमणे काढली जातील, असे आश्‍वासन मुख्यमंत्र्यांनी दिल्याचे माजी खासदार संभाजीराजे छत्रपती यांनी सांगितले आहे. त्यामुळे मुख्यमंत्र्यांनी रात्रीच्या धावत्या दौऱ्यात या कारवाईच्या संदर्भाने सूचना दिल्याची शक्यता व्यक्त होत आहे.