Kolhapur Rain Update: कोल्हापुरात पावसाची जोरदार बॅटिंग, चंदगड आणि करवीर तालुक्यात घरांची पडझड, एस. टी.च्या २७२ फेऱ्या रद्द

चंदगड तालुक्यात सुंडी येथे प्रकाश देसाई यांच्या घराची भिंत पडून सुमारे तीस हजारांचे नुकसान झाले आहे. कोवाड येथील मसनु सुतार यांच्या शेतातील घराची भिंत पडून पस्तीस हजारांचे, तर कानूर बुद्रक येथील सुरेश नाईक यांच्या घराची भिंत कोसळून दहा हजारांचे नुकसान झाले.

(kolhapur flood update)

करवीर तालुक्यात १९ घरांच्या भिंती पडल्या

पावसामुळे घराच्या भिंती गरवून करवीर तालुक्यात दोन दिवसात १९ घरांच्या भिंती पडल्या आहेत. सुदैवाने कोणतीही जीवितहानी झालेली नाही. महसूल विभागाने पंचनामे केले असून ,सुमारे ९ लाखाचे नुकसान झाले आहे. तर एके ठिकाणी जनावरांचा गोठा जमीन दोस्त झाला आहे.

पुणे-बंगळूर महामार्ग सेवा रस्त्यावर पाणी

शिरोली पुलाची : संततधार पावसामुळे येथील सेवामार्गावर पाणी आले आहे. पुणे-बंगळूर राष्ट्रीय महामार्गाच्या चौपदरीकरणात पंचगंगा पुलापासून शिरोलीतील वाहतुकीसाठी सेवामार्ग बांधला आहे. रस्त्यावर आज रुक्मिणी मंगल कार्यालय ते पटेल हॉलदरम्यान पाणी आले. रस्त्यावर सुमारे दीड ते दोन फूट पाणी आहे.

बावडा ते शिये मार्गावर पाणी

पंचगंगा नदीला आलेल्या पुराचे पाणी कसबा बावडा ते शिये मार्गावर साधारण एक फुट पाणी आले आहे. या पाण्यातूनच धोकादायक वाहतून सुरू आहे. पावसाचा जोर कायम राहील्यास रात्री उशीरानंतर हा रस्ताही वाहतुकीसाठी बंद होण्याची शक्यता आहे.

एस. टी.च्या २७२ फेऱ्या रद्द

एस. टी. च्या दिवसभरात एकूण २७२ फेऱ्या रद्द केल्या. परिणामी राज्य परिवहन महामंडळाच्या कोल्हापूर विभागाचे ३ लाख ७४ हजार २४२ रुपयांचे उत्पन्न बुडाले. गडहिंग्लज आगारातील सर्वाधिक ६०, चंदगड ५७, तर संभाजीनगर आगारातील ५२ फेऱ्यांचा त्यात समावेश राहिला. गगनबावडा आगाराचे सर्वाधिक १ लाख ११ हजार ६६० रुपये इतके उत्पन्न बुडाले.