शिरोळला सोमवारपासून उरूस

शिरोळला सोमवारपासून उरूस
पृथ्वीराजसिंह यादव ः धार्मिक सोहळ्याबरोबर विविध कार्यक्रम
सकाळ वृत्तसेवा
शिरोळ, ता. १ ः येथील ग्रामदैवत श्री बुवाफन महाराज उत्सव व हजरत नूरखान बादशाह उरूस सोमवार (ता. ४) ते शुक्रवार (ता. ८) दरम्यान होणार आहे. यानिमित्त धार्मिक सोहळ्याबरोबर विविध कार्यक्रम होणार असल्याची माहिती श्री बुवाफन महाराज उत्सव व हजरत नूरखान बादशाह उरूस संयोजन समितीचे प्रमुख पृथ्वीराजसिंह यादव यांनी पत्रकार परिषदेत दिली.
ते म्हणाले, ‘सोमवारी सकाळी सव्वानऊ वाजता श्री बुवाफन महाराज यांच्या समाधीस महाअभिषेक व पूजा करण्यात येणार आहे. यादिवशी पुरुष व महिला गटाची रांगोळी स्पर्धा, तालुका मर्यादित दुहेरी कॅरम स्पर्धा होईल. दुचाकीबरोबर रेडकू पळवणे, म्हैस पळवणे स्पर्धा होईल. रात्री श्री बुवाफन महाराज मंदिरात मानकरी यांच्या उपस्थितीत गंधरात्र होईल.
मंगळवारी गावातील बिनदाती व दोन दाती बैलगाडी, गावातील घोडागाडी, गावातील दुबैली गाड्यांच्या शर्यती होणार आहेत. अर्जुनवाड रस्त्यावर महिला व पुरुष गटाची मॅरेथॉन, हातगाडा, महिला व पुरुष गटाची सायकल स्पर्धा होणार आहे. सायंकाळी मानाचा गलिफ अर्पण करण्यात येणार आहे.
बुधवारी खुला बैल पळवणे, गावातील कामाठी बैलगाडी शर्यती, खुल्या गटातील आणि इनलाईन स्केटिंग स्पर्धा, गाडी मागून श्वान पळवणे स्पर्धा होईल. सायंकाळी श्री बुवाफन महाराज मंदिरासमोरील (कै.) माजी आमदार दिनकरराव यादव कुस्ती आखाडा येथे कुस्त्यांचे मैदान होणार आहे. रात्री हजरत नुरखान बादशाह दर्गाह येथे गंधरात्र होणार आहे. गुरुवारी सकाळी जनरल घोडागाडी, अ गटातील जनरल दुबैली गाड्या, ब गटातील जनरल दुबैली गाड्या तसेच ट्रॅकवरील श्वान शर्यत होईल. याशिवाय सुदृढ बैल जोडी, उत्कृष्ट देशी गाय, उत्कृष्ट देशी घोडा, बिनदाती खोंड, संकरित गाय, मुरा/ म्हैसाणा म्हैस, पंढरपुरी म्हैस स्पर्धा होणार आहे. सायंकाळी मानाचा गलिफ अर्पण करण्यात येणार आहे. शुक्रवारी छत्रपती शिवाजी चौकातील भाजी मंडई येथे एकतारी भजनी स्पर्धा होणार आहे. स्पर्धेतील विजेत्यांना रोख रक्कम, कायम चषक व ढाल आणि शिल्ड पारितोषिक म्हणून दिले जाणार आहे. माजी ग्रामपंचायत सदस्य विजय आरगे, श्री बुवाफन महाराज उत्सव व हजरत नूरखान बादशाह उरुस समितीचे अध्यक्ष बाळासाहेब जगदाळे, उपाध्यक्ष संतोष विटेकरी, प्रदीप हेरवाडे आदी उपस्थित होते.