राज्यघटना कोणीही बदलू शकत नाही

राज्यघटना कोणीही बदलू शकत नाही
डॉ. अशोक चौसाळकर ः शिरोळमध्ये प्रबोधन शिबिर
सकाळ वृत्तसेवा
शिरोळ, ता. ३० ः राज्यघटना समजावून घेऊन ती टिकवून ठेवणे व त्याची अंमलबजावणी करणे ही पुढील पिढीची जबाबदारी आहे. उदारमतवादी लोकशाही, सामाजिक न्यायाचा विचार आणि धर्मनिरपेक्ष राष्ट्रवादाचा विचार हा राज्यघटनेतून केला आहे. अनेक देशांत राज्यघटना बदलल्या; पण भारतात नाही. त्यामुळे आम्ही निर्धार केला तरी कोणीही राज्यघटना बदलू शकत नाही, असे प्रतिपादन ज्येष्ठ विचारवंत व समाजवादी प्रबोधिनीचे अध्यक्ष डॉ. अशोक चौसाळकर यांनी केले.
भारतीय स्वातंत्र्याच्या अमृत महोत्सवी वर्षाची सांगता आणि भारतीय संविधानाच्या अमृत महोत्सवी वर्षारंभानिमित्त डॉ. आप्पासाहेब उर्फ सा. रे. पाटील सोशल फाउंडेशन आणि समाजवादी प्रबोधिनीतर्फे आयोजित प्रबोधन शिबिरामध्ये ‘भारतीय स्वातंत्र्य लढा व राज्यघटना’ या विषयावर ते बोलत होते. अध्यक्षस्थानी विनोद शिरसाठ होते.
दुसऱ्या सत्रात ‘स्पर्धा परीक्षा मार्गदर्शन व संविधान’ या विषयावर बोलताना सोलापूरचे अप्पर जिल्हाधिकारी तुषार ठोंबरे म्हणाले, ‘नोकरशाहीमधील नोकर ज्यावेळी आपल्याला आपल्या समाजाचा, आपल्या जातीचा आहे असे वाटतो, त्यावेळी लोकशाहीचा पराभव झाला असे म्हणावे लागेल. त्यामुळे नोकरशाहीवर संविधान जपण्याची मोठी जबाबदारी आली आहे.’ तिसऱ्या सत्रामध्ये ‘युवकांची जबाबदारी व कर्तव्ये’ या विषयावर बोलताना पत्रकार संजय आवटे यांनी मनोगत व्यक्त केले. डॉ. भालबा विभुते, प्राचार्य डॉ. टी. एस. पाटील, शशांक बावचकर, पुणे कमिशनर वैशाली पतंगे, दत्त कारखान्याचे कार्यकारी संचालक एम. व्ही. पाटील, सचिव अशोक शिंदे, दादा काळे आदी उपस्थित होते. स्वागताध्यक्ष उद्यानपंडित गणपतराव पाटील यांनी स्वागत केले. सूत्रसंचालन संजय सुतार यांनी केले. आभार संजय गुरव यांनी मानले.