वारणा दूध संघामार्फत दीपावली निमित्त सभासदांना तूप भेट - अध्यक्ष डॉ. विनय कोरे यांची माहीती / ६ पासून वाटप

04051
वारणा दूध संघामार्फत सोमवारपासून
सभासदांना दीपावलीनिमित्त तूप भेट

वारणानगर, ता. २ : तात्यासाहेब कोरेनगर येथील वारणा सहकारी दूध उत्पादक संघाच्यावतीने दीपावलीनिमित्त दरवर्षीप्रमाणे सभासदांना तूप देण्यात येणार असल्याची माहिती संघाचे अध्यक्ष आमदार डॉ. विनय कोरे यांनी दिली.
६ ते २० नोव्हेंबर कालावधीत प्राथमिक दूध संस्था, वितरण केंद्रे व वितरकांमार्फत तूप वाटप करण्यात येईल. वारणा दूध संघाच्या ज्या ‘अ’ वर्ग सभासदांनी शेअर पूर्ण केले आहेत व जे दुधाचा दूध संस्थामार्फत संघास पुरवठा करतात अशा ‘अ’ वर्ग सभासदांना, ‘ब’ वर्ग संस्था सभासदांना व राज्यभरातील ‘क’ वर्ग ग्राहक सभासदांना संघामार्फत दरवर्षी महाशिवरात्री, गणेशचतुर्थी व दीपावलीला सवलतीत तूप भेट म्हणून दिले जाते. वारणा दूध संघाच्या कार्यक्षेत्रातील दूध संस्थांकडे सभासदांना ६ ते २० नोव्हेंबर कालावधीत तूप वितरण होईल. कोल्हापूर व परिसरातील ‘अ’ वर्ग व ‘क’ वर्ग सभासदांचे तुपाचे स्टेशन रोड कोल्हापूर विक्री केंद्रातून ६ नोव्हेंबरपासून वाटप सुरू होईल. सभासद व ग्राहकांनी कागदपत्रांची झेरॉक्स दाखवून तूप घेऊन जावे, असे आवाहन कार्यकारी संचालक मोहन येडूरकर यांनी केले. यावेळी संघाचे उपाध्यक्ष एच.आर. जाधव, संचालक मंडळ, अकौट्स मॅनेजर सुधीर कामेरिकर व अधिकारी उपस्थित होते.