Tilari Dam : कुटुंबीयांच्या डोळ्यांदेखत मोठी दुर्घटना; तिलारी धरणात बुडाले दोन सख्खे भाऊ

चंदगड : हाजगोळी (Hajgoli Chandgad) हद्दीमध्ये तिलारी धरणाच्या (Tilari Dam) बॅकवॉटरमध्ये दोघे सख्खे भाऊ बुडाले. रेहान अल्ताफ खान (वय १५) व त्याचा भाऊ मुस्तफा अल्ताफ खान (१२, रा. कॅम्प, बेळगाव) अशी त्यांची नावे आहेत.

काल सायंकाळी साडेपाचच्या सुमारास कुटुंबीयांच्या डोळ्यांदेखतच ही दुर्घटना घडली. पोलिसांनी घटनास्थळी शोध घेतला असता ते अद्याप सापडलेले नाहीत. अंधार आणि पाऊस यामुळे शोधमोहीम थांबवण्यात आली.

आज (ता. ११) सकाळी पुन्हा शोध घेण्यात येणार असल्याचे पोलिस निरीक्षक संतोष घोळवे यांनी सांगितले. बेळगावहून एक कुटुंबीय हाजगोळी भागात फिरण्यासाठी आले होते. चाळोबा मंदिरानजीक तिलारी धरणाचे बॅकवॉटर विस्तीर्ण पसरले आहे.

रेहान व मुस्तफा पाण्यात खेळत असताना अंदाज न आल्याने ते बुडू लागले. कुटुंबातील अन्य कोणाला पोहता येत नसल्याने त्यांनी आरडाओरड केली. परंतु परिसरात कोणी नसल्यामुळे मदत उपलब्ध होऊ शकली नाही. यासंदर्भात पोलिस ठाण्याकडे माहिती मिळताच सहाय्यक पोलिस निरीक्षक कांबळे, पोलिस नाईक किल्लेदार, काँस्टेबल देसाई बचाव पथकासह घटनास्थळी दाखल झाले. त्यांनी या मुलांचा शोध घेतला असता ते सापडले नाहीत. या भागात पाऊस आणि अंधार पडल्यामुळे शोध मोहीम थांबवण्यात आली. उद्या (ता. ११) सकाळी पुन्हा शोध घेतला जाणार आहे.