विशाळगडावरील 'अतिक्रमण'चा वाद चिघळला! माजी खासदार संभाजीराजेंना अटक करण्याची मुस्लिम समाजाची मागणी

कोल्हापूर : माजी खासदार संभाजीराजे (Sambhaji Raje) यांच्या ‘चलो विशाळगड’ अभियानामुळेच गजापुरात तोडफोडीचा प्रकार घडला. घरांची तोडफोड आणि जाळपोळ झाली. त्यामुळे त्यांना तातडीने अटक करा, अशी मागणी मुस्लिम समाजाच्या (Muslim Community) विविध संघटनांनी केली. त्यासाठी त्यांनी दसरा चौकात निदर्शने केली. तसेच, जिल्हाधिकाऱ्यांनाही निवेदन दिले.

निवासी उपजिल्हाधिकारी संजय तेली यांनी निवेदन स्वीकारून मुस्लिम संघटनांच्या प्रतिनिधींशी चर्चा केली. विशाळगड, गजापुरातील घटनेचे पडसाद काल शहरात उमटले. दुपारी एक वाजता मुस्लिम बोर्डिंगमध्ये विविध संघटनांची बैठक झाली. यामध्ये संघटनांच्या पदाधिकाऱ्यांनी गजापुरातील घटनेचा तीव्र शब्दांत निषेध केला. तसेच जिल्ह्यात कोठेही अनुचित प्रकार घडू नये, यासाठी शांततेचे आवाहन केले. त्यानंतर काही संघटनांच्या प्रतिनिधींनी दसरा चौकात येऊन संभाजीराजे यांच्याविरोधात निदर्शने केली. यावेळी सर्वांनी संभाजीराजे यांना अटक करावी, अशी मागणी केली.

त्यानंतर मुस्लिम संघटनांनी जिल्हाधिकाऱ्यांना शिष्टमंडळाने जाऊन निवेदने दिली. ऑल इंडिया मजलिस - ए - इत्तेहादुल मुस्लिमीन संघटनेने जिल्हाधिकाऱ्यांना निवेदन दिले. यावेळी संघटनेचे पश्चिम महाराष्ट्र उपाध्यक्ष डॉ. महेश कांबळे, इम्रान सनदी, अस्लम मुल्ला, नुसरतशानूर मुजावर, राहुल कांबळे यांच्यासह कार्यकर्ते उपस्थित होते. द मोहामेडन एज्युकेशन सोसायटी यांनी दोषींवर कठोर कारवाई करण्याची मागणी करणारे निवेदन दिले. शिष्टमंडळात गणी आजरेकर, शकिल अत्तार, रफिक मुल्ला, हुसेन मुजावर, गुलाब मुजावर आदींचा समावेश होता.

अल्पसंख्याक समाजाला सुरक्षितता, आर्थिक मदत द्या

गजापूर येथील घटनेमध्ये अल्पसंख्याक समाजातील घरांची तोडफोड करण्यात आली. अशा प्रकारातून सामाजिक ऐक्य बिघडवण्याचा प्रयत्न केला गेला. यामध्ये जे दोषी आहेत त्यांच्यावर कठोर कारवाई व्हावी. तसेच ज्यांचे आर्थिक नुकसान झाले आहे, त्यांना तातडीची मदत मिळावी, अशी मागणी समस्त मुस्‍लिम समाजातर्फे करण्यात आली आहे. या मागणीचे निवेदन त्यांनी जिल्हाधिकाऱ्यांना दिले. निवासी उपजिल्हाधिकारी संजय तेली यांनी हे निवेदन स्‍वीकारले. शिष्टमंडळात माजी नगरसेवक तौफिक मुल्लाणी, मुस्ताक मलबारी, झाकीर कुरणे, युसूफ शेख, सलमान मौलवी, कासिम चाबुकस्वार, जाफर मलबारी आदींचा समावेश होता.