Hidkal Dam : हिडकल जलाशयात 1928 मध्ये उभारलेलं विठ्ठल-रखुमाई मंदिर अखेर पाण्याखाली; धरणात दर्शनासाठी होत होती गर्दी

गोकाक : गेल्या सव्वा महिन्यापासून हिडकल जलाशयात (Hidkal Dam Temple) पाणीपातळी कमी झाल्यामुळं विठ्ठल-रखुमाई मंदिराचे (Vitthal-Rakhumai Temple) दर्शन झाले होते. मात्र, दोन दिवस पडलेल्या मुसळधार पावसामुळं जलाशयातील पाणीपातळीत वाढ झाल्याने बुधवारी (ता. १९) हे मंदिर पाण्याखाली गेले.

हिडकल (ता. हुक्केरी) येथील राजा लखमगौडा जलाशयाच्या पायथ्याजवळ असणाऱ्या होन्नूर येथे परिसरातील जनतेनं वंटमुरी देसाई यांच्या सहाय्याने १९२८ मध्ये मंदिराची उभारणी केली होती. मात्र, १९६४ मध्ये हिडकल जलाशयाचे बांधकाम हाती घेतल्यानंतर १९७७ मध्ये हे मंदिर पाण्याखाली गेले.

यावेळी जनतेनं राज्य सरकारच्या मदतीनं जलाशयातील मंदिराच्या बांधकामास धक्का न लावता नवीन जागेत त्याचं स्थलांतर केलं. ५१ टीएमसी क्षमतेच्या हिडकल जलाशयात १० टीएमसी पाण्याचा साठा झाल्यानंतर पाणी गाभाऱ्यापर्यंत येते. २० टीएमसी पाण्याचा साठा झाल्यावर कळसासह मंदिर पूर्णपणे पाण्याखाली जाते.

यंदा १७ जून रोजी जलाशयाची पातळी १० टीएमसीपेक्षा कमी होऊन मंदिर दर्शनासाठी खुले झाले. योगायोगाने १९ जून रोजी आषाढी एकादशी आल्याने विठ्ठल-रखुमाई दर्शनासाठी भाविकांची येथे मोठी गर्दी झाली होती. यावर्षी पाऊस लांबल्याने महिनाभरापासून येथे भाविकांचा प्रचंड ओघ सुरू होता.