Loksabha Election : लोकसभा जवळ येताच पश्चिम महाराष्ट्रात काँग्रेसकडून मोठा बदल; 'या' नेत्यांना दिली महत्वाची जबाबदारी

कोल्हापूर : लोकसभा क्षेत्रातील स्थानिक पातळीवरील राजकीय स्थितीची सविस्तर माहिती मिळावी याकरता काँग्रेस पक्षाकडून लोकसभा क्षेत्रनिहाय निरीक्षक व समन्वयकांची नियुक्ती करण्यात आली.

यामध्ये कोल्हापूर जिल्हा काँग्रेसचे अध्यक्ष सतेज पाटील (Satej Patil) यांची रत्नागिरी व रायगड जिल्ह्याच्या निरीक्षकपदी निवड झाली. ही निवड मुंबई येथे प्रदेश काँग्रेसचे अध्यक्ष नाना पटोले (Nana Patole) यांनी जाहीर केली.

निवड झालेले निरीक्षक व समन्वयक यांनी संबंधित जिल्हाध्यक्ष यांच्याबरोबर समन्वय साधून ७ ते १४ ऑगस्टदरम्यान निरीक्षकांच्या लोकसभा क्षेत्राचा विधानसभानिहाय दौरा व बैठकीचे नियोजन करायचे आहे.

लोकसभा क्षेत्रातील आजी-माजी खासदार, आमदार, प्रमुख नेते, प्रदेश पदाधिकारी, जिल्हा पदाधिकारी, ब्लॉक अध्यक्ष, आघाडी संघटना विभाग व सेलचे जिल्हा पदाधिकारी यांना बैठकीत निमंत्रित करून तसा अहवाल प्रदेश काँग्रेसला पाठवायचा आहे. तर कोल्हापूर व हातकणंगले मतदारसंघासाठी पृथ्वीराज चव्हाण यांची निरीक्षक म्हणून तर समन्वयक म्हणून अभय छाजेड व रणजित देशमुख यांची निवड करण्यात आली आहे.