श्रीरामपूर ः तालुक्‍यातील ग्रामीण भागात सध्या विजेचा लपंडाव सुरू आहे. त्यामुळे शेतकऱ्यांची डोकेदुखी वाढली आहे. अवघ्या पाच मिनिटांत ट्रीप होणाऱ्या मोटारींमुळे आता शेतकरी त्रासले आहेत. पिकांना पाणी देण्यात विजेचा अडथळा येत आहे. त्यात दिवसा नियमित वीजपुरवठा होत नसल्यामुळे शेतकऱ्यांना रात्री जागरण करून पिकांना पाणी देण्यासाठी जावे लागते.
सध्या कडाक्‍याची थंडी जाणवत असताना, रात्री कुडकुडत अनेक शेतकरी पिकांना पाणी देत आहेत. यंदा विहिरींना चांगला पाणीसाठा आहे. मात्र, नियमित वीजपुरवठा होत नसल्याने, या पाण्याचाही काहीच उपयोग घेता नसल्याची खंत शेतकरी व्यक्त करीत आहेत. काही शेतकऱ्यांच्या विहिरी शेतापासून दूर आहेत. त्यात पाच-पाच मिनिटांनी वीज गायब होते. त्यामुळे वीजपंप सुरू करण्यासाठी या शेतकऱ्यांना मोठी पायपीट करावी लागते. त्यामुळे काही शेतकऱ्यांना थेट विहिरीजवळ पंप सुरू करण्यासाठी एकाची नेमणूक करावी लागत आहे.
हेही वाचा - हजेरी शाळांत.. मुले उसाच्या फडात!
नवीन समस्या
शेतकऱ्यांसाठी सरकारने मोफत नियमित पूर्ण वेळ वीजपुरवठा द्यावा, अशी मागणी शेतकरी संघटनेने केली आहे. शेतकऱ्यांना नियमित वीजपुरवठा होत नसल्यामुळे, अनेकांनी वीज कंपनीच्या कारभारावर नाराजी दर्शविली आहे. तसेच, ग्रामीण भागातील विजेच्या रोहित्रावर अधिक भार असल्यामुळे रोज नवीन समस्या उद्‌भवत असल्याची तक्रार शेतकऱ्यांनी केली आहे.
शेतकऱ्यांची डोकेदुखी
विजेच्या लपंडावामुळे शेतकऱ्यांची डोकेदुखी वाढली असून, दिवसभरात आठ ते दहा वेळा वीज गायब होते. दिवसभरात फक्त चार तास वीज मिळते. वीज गेल्यावर अर्धा तास पंप बंद होतात. सध्या पाण्याचे प्रमाण चांगले असल्यामुळे, सर्वांचेच पंप सुरू आहेत. दिवसा भरणे होत नसल्यामुळे रात्री जागरण करून थंडीत पाणी भरण्यावर शेतकरी भर देतात. सरकारने शेतकऱ्यांच्या हिताचे धोरण राबवावे. - सोन्याबापू शिंदे, सरपंच, नाऊर (श्रीरामपूर)
400 मेगावॉट वीजपुरवठा
फीडरवरील वीजभाराची क्षमता वाढल्यामुळे वीज ट्रीप होते. सध्या तालुक्‍यात 400 मेगावॉट वीजपुरवठा होतो. परंतु एकाच वेळी वीजपंप सुरू होतात. त्यामुळे अनावश्‍यक भार सहन करावा लागत आहे. हा भार कमी करण्यासाठी वीजचोरी करणाऱ्यांवर तातडीने कारवाई केली जाणार आहे. - शरद बंड, कार्यकारी अभियंता, महावितरण, श्रीरामपूर
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.