भिवंडीत मस्जिदजवळ गणेश मूर्तीवर दगड मारला, आता त्यांचे विचारवंत कुठं दडून बसलेत? नीतेश राणेंचा स्पष्ट इशारा

शिराळा : आमच्या धर्माला आव्हान दिले जात आहे. मात्र, हिंदुत्ववाबाबत तडजोड होणार नाही. हिंदूंची बाजू घेणे, हक्क मागणे म्हणजे दंगल घडवणे नव्हे. आमच्या मिरवणुकीकडे वाकड्या नजरेने पाहू नये. देवदेवतांच्या मिरवणुकीवर दगड मारणे आता चालणार नाही. ही दगड फेक बंद न झाल्यास तुमच्या मिरवणुकीवर येणाऱ्या दगडाचा हिशेब ठेवावा लागेल. आता आम्ही गप्प बसणार नाही. जो नियम मुस्लिम (Muslim Community) बांधवाना असेल तोच हिंदूंना असेल त्यावेळी हिंदू सखल मोर्चे दिसणार नाहीत, असा इशारा आमदार नीतेश राणे (Nitesh Rane) यांनी दिला.

शिराळा येथे आयोजित हिंदू जनआक्रोश मोर्चावेळी (Hindu Janakrosh Morcha) झालेल्या जाहीर सभेत ते बोलत होते. मोर्चा अंबामाता मंदिर, मरिमी चौक, सोमवार पेठ, कुरणे गल्ली, पूल गल्ली, बस स्थानक मार्गे तहसील कार्यालयाजवळ आला. नंतर मोर्चाचे रूपांतर जाहीर सभेत झाले. व्यासपीठावर अनिल देवळेकर, सुनिल धुमाळ उपस्थित होते.

राणे म्हणाले, जे आमच्या बाबत दिल्लीला तक्रार करतात त्यांनी आपल्या गणपती मिरवणुकीवर दगड मारणाऱ्याबद्दल ही तक्रार करायला हवी. त्यांनी त्याचा निषेध करायला हवा होता. डॉ. बाबासाहेब आंबेडकर यांचे संविधान हे समान हक्काचे प्रतीक आहे. मग हा दुजाभाव का निर्माण होत आहे. याचे आत्म परीक्षण करण्याची वेळ आली आहे. आमची उंची मोजणाऱ्यांनी आमच्या नादी लागू नये.

भिवंडीमधील हिंदुस्तान मस्जिदजवळ गणेश मूर्तीवर दगड मारला. त्यांचे विचारवंत आत्ता कुठे दडून बसले आहेत. विशाळगडावर दगड, हत्यारे कुठून आली. तुमचा धर्म तुम्हाला जितका प्रिय आहे. तितकेच आमचे हिंदुत्व धगधगते आहे. प्रारंभी स्वामी भक्त सुनिल धुमाळ, कीर्तनकार अनिल देवळेकर यांनी मनोगत व्यक्त केले. यावेळी सत्यजित देशमुख,सम्राट महाडिक, सुखदेव पाटील, पृथ्वीसिंह नाईक,केदार नलवडे, सम्राट शिंदे, कुलदीप निकम उपस्थित होते.

ज्ञानेश महाराव यांना अटक करा

श्री राम प्रभू, स्वामी समर्थ यांच्यावरती ज्ञानेश महाराव याच्या कडून टीका करण्यात आली. त्यामुळे सकल हिंदू समाजाच्या भावना दुखावल्या गेल्या आहेत. काही लोक महंत रामगिरी महाराज यांच्या विरुद्ध संविधानाचे उल्लंघन करून आंदोलन करत आहेत. त्यांच्या विरोधात देशद्रोहाचा गुन्हा दाखल करा व त्‍यांना अटक करावी.

दगडफेकीचा पवारांनी आक्षेप नोंदवला का?

उपमुख्यमंत्री अजित पवार यांची गृहमंत्री अमित शहा यांच्याकडे तक्रार करणेची भूमिका हा त्यांचा पक्षीय विषय आहे. मात्र, आपली हिंदुत्वबाबत तडजोड नाही. पवार यांनी गणेश विसर्जन मिरवणुकीवर केलेल्या दगडफेकीबाबत निषेध, अक्षेप नोंदवला का? त्यांनी हे केले असते तर त्यांना तक्रारही करावी लागणार नसल्याचे त्‍यांनी सांगितले.