NCP Crisis : 'करेक्ट कार्यक्रम व्हायचा नसेल तर दादांकडं या'; जयंत पाटलांवर निशाणा साधत कोणी दिला इशारा?

Miraj News : राज्याचा कारभार धमक असणाऱ्या नेत्यावरच चालतो. ते म्हणजे अजित दादाच (Ajit Pawar), तर काहींकडून नुसते करेक्ट कार्यक्रमच केले गेले. तर इतरांचा करेक्ट कार्यक्रम व्हायचा नसेल तर अजित दादांची साथ केंव्हाही बरीच, अशी टीका माजी मंत्री जयंत पाटलांवर (Jayant Patil) नाव न घेता विठ्ठल पाटील यांनी केली.

तर, माजी महापौर इद्रिस नायकवडी यांनी दादांनी घेतलेल्या निर्णयानंतर क्षणाचा ही विलंब न लावता दादा गटात सामील होणार असल्याचा निर्णय घेतल्याचं सांगितलं. मिरजेतील बालगंधर्व नाट्यगृहात अजितदादा गटाच्या कार्यकर्त्यांचा पहिला मेळावा पार पडला.

यावेळी नगरसेवक अतहर नायकवडी, नगरसेवक योगेंद्र थोरात, कवठेपिरानचे माजी सरपंच भीमराव माने, साजिद पठाण उपस्थित होते.

वारकरी साहित्य परिषदेचे राज्य अध्यक्ष तथा दादा गटाचे नेते विठ्ठल काकाजी पुढे म्हणाले, 'सहकार, शिक्षण, शेती अशा सर्वच क्षेत्रांमध्ये अजितदादां एवढा जाणता नेता राज्यात नाही. वारकरी संप्रदायाचे प्रश्न अजितदादाच सोडवू शकतात. कुणाचाही कार्यक्रम करतो असे म्हणणारे अजितदादा नाहीत. त्यांच्याभोवती चांडाळ चौकडी जमू शकत नाही.'

इद्रिस नाईकवडी म्हणाले, मी राजाराम बापूंच्या कुशीत घडलेला कार्यकर्ता आहे. कुणाच्या नकारात्मकतेवर माझा राजकीय संसार मांडलेला नाही. मनात कोणता तरी "कार्यक्रम" ठेवून न वागणाऱ्या महान नेत्याच्या हाताखाली तयार झालो आहे. मला आव्हान देता येईल, मात्र माझा "कार्यक्रम" करणं सोपं नाही.

नगरसेवक योगेंद्र थोरात म्हणाले, २३ वर्षांपासून राष्ट्रवादीचा एकनिष्ठपणे काम केले. मात्र मी ज्यांचा पक्षात प्रवेश घडवला, अशा माझ्या नंतर आलेल्या लोकांना माझ्या अगोदर संधी देण्यात आली. यावेळी भीमराव माने यांनीही मनोगत व्यक्त केले.

नगरसेवक जिल्हा परिषद सदस्य संपर्कात

मनपा क्षेत्रातील १० नगरसेवक आणि १५ जिल्हा परिषद सदस्य संपर्कात आहेत. येणाऱ्या काळात आश्चर्याचा धक्का बसेल असे चेहरे अजितदादांच्या व्यासपीठावर दिसतील, असेही नाईकवडी व पाटील यांनी जाहीर केले.