शेतकरी कायद्याच्या विरोधात उद्या निपाणी तालुका बंद

निपाणी : केंद्र सरकारने केलेल्या कायद्यामुळे देशातील शेतकरी अडचणीत सापडला आहे. त्याच्या विरोधात बऱ्याच महिन्यापासून दिल्ली येथे आंदोलन सुरू आहे. तरीही त्याची केंद्र सरकारने दखल न घेतल्याने सोमवारी (ता.२७) भारत बंदची हाक शेतकरी संघटनेने दिली आहे. त्याला पाठिंबा देण्यासाठी चिक्कोडी जिल्हा रयत संघटनेतर्फे निपाणी तालुका बंद ठेवण्यात येणार असल्याची माहिती चिक्कोडी जिल्हाध्यक्ष राजू पोवार यांनी दिली. रविवारी (ता.२६) दुपारी येथील शासकीय विश्रामगृहावर आयोजित शेतकऱ्यांच्या बैठकीत ते बोलत होते.

राजू पोवार म्हणाले, केंद्र सरकारने शेतजमीन विक्री बाबत नवीन कायदा केला आहे.हा कायदा शेतकऱ्यांना जाचक ठरत असून भविष्यात शेतकरी भूमिहीन होणार आहे. याबाबत नवी दिल्ली येथे शेतकऱ्यांचे आंदोलन सुरू असून याकडे शासनाचे दुर्लक्ष झाले आहे. याशिवाय शेतमालाला हमीभाव मिळत नसल्याने शेतकरी वर्षानुवर्षे कर्जाच्या खाईत लोटत जात आहेत.

कोरोना काळात शेतीमालाला दर न मिळाल्याने भाजीपाला पिके रस्त्यावर फेकून द्यावी लागली आहेत. या शिवाय महापूर काळातही पिकांचे मोठ्या प्रमाणात नुकसान होऊनही अद्याप कोणतीही भरपाई मिळालेली नाही. याउलट शेतकऱ्यांचे वीज बिल माफ न करता त्याची वसुली केली जात आहे. त्यामुळे शेतकरी अडचणीत सापडला आहे. अशा विविध मागण्यासाठी सोमवारी (ता.२७) निपाणी तालुका बंदची हाक दिली आहे. त्यामध्ये निपाणी शहर व परिसरातील शेतकऱ्यांनी सहभागी व्हावे. तेथे धर्मवीर संभाजी सर्कलमध्ये शेतकरी एकत्रित येऊन त्यांच्याकडून तहसीलदारांना निवेदन दिले जाणार आहे. यावेळी उपस्थित राहण्याचे आवाहन रयत संघटनेतर्फे करण्यात आले आहे.

प्रा. आय. एन. बेग यांनी, केंद्र सरकारच्या शेतकरीविरोधी धोरणाचा निषेध करून निपाणी तालुका बंदमध्ये सर्व व्यापाऱ्यांनी सहभागी होऊन सहकार्य करण्याचे आवाहन केले.यावेळी नारायण पाटील, संदीप चौगुले, उमेश परीट, बाळासाहेब हादीकर, उमेश भारमल, अनंत पाटील, राजू पाटील, अल्लाउद्दीन शिरगुप्पे, विजय सावजी यांच्यासह शेतकरी उपस्थित होते.