पलूस : महायुतीचे सरकार पुन्हा सत्तेत आल्यानंतर सांगलीच्या विकासाची बुलेट ट्रेन अधिक वेगाने धावेल, असा विश्वास केंद्रीय रस्ते वाहतूक मंत्री नितीन गडकरी यांनी गुरुवारी येथे व्यक्त केला. भाजप महायुतीचे उमेदवार संग्राम देशमुख यांच्या प्रचारार्थ आयोजित सभेत ते बोलत होते. यावेळी माजी आमदार पृथ्वीराज देशमुख व्यासपीठावर उपस्थित होते.
श्री. गडकरी म्हणाले, ‘सध्या शेतमालाला भाव नाही. त्यामुळे शेतकरी अडचणीत आले. त्यासाठी ऊस, सोयाबीन व इतर शेतमालापासून इथेनॉल निर्मितीकडे सरकारचे लक्ष आहे. मोठ्या प्रमाणावर इथेनॉल निर्मिती झाल्यानंतर दुचाकी, चारचाकी वाहनांबरोबर विमान सुद्धा इथेनॉलवर चालेल.
त्यामुळे ऊस, सोयाबीन व इतर शेतमालाला चांगला भाव मिळून शेतकऱ्यांना चांगले दिवस येतील. १९७५ मध्ये काँग्रेस सरकारने संविधानाची तोडफोड केली. मात्र, तेच आज संविधान धोक्यात असल्याचे सांगून व्हिजन नसलेले लोक जनतेची दिशाभूल करीत आहेत.’
ते पुढे म्हणाले, ‘भाजप सरकारने महामार्ग, विविध सिंचन योजना व विकासावर भर दिला. भाजप कधीच जातीपातीचे राजकारण करीत नाही. केंद्र व राज्य सरकारने जातीभेद न करता लाडकी बहीण योजनेबरोबर इतर योजनांचा लाभ सर्वांना दिला आहे. संग्राम देशमुख तरुण व उच्चशिक्षित उमेदवार आहेत. त्यांना विजयी केल्यास विकासकामांची जबाबदारी आमची राहील.’
यावेळी अॅड. सूर्यजित चव्हाण यांनी काँग्रेस पक्षात प्रवेश केला. यावेळी सर्जेराव नलवडे, दीपक मोहिते, धनंजय देशमुख, भाजपचे तालुकाध्यक्ष मिलिंद पाटील, संदीप पाटील, नीलेश येसुगडे, रामानंदनगर पाटील, सूर्यजित चव्हाण, तसेच भाजप व महायुतीतील पक्षाचे पदाधिकारी, कार्यकर्ते, मतदार उपस्थित होते.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.