Shaktipeeth Highway : शक्तिपीठ महामार्ग वादात! 12 जिल्ह्यांतील शेतकऱ्यांचा तीव्र विरोध; 805 किमीला 86,000 कोटींचा येणार खर्च

जयसिंगपूर : राज्यात नव्याने होणाऱ्या शक्तिपीठ महामार्गाला (Shaktipeeth Highway) १२ जिल्ह्यांतील शेतकऱ्यांतून तीव्र विरोध होत आहे. त्यामुळे हा महामार्ग वादाच्या भोवऱ्यात सापडला आहे. पत्रादेवी-बांदा (ता. सावंतवाडी जि. सिंधुदुर्ग) ते दिगरज (जि.वर्धा) असा एकूण ८०५ किलोमीटरचा महामार्ग आहे. त्यासाठी ८६ हजार कोटी रुपयांचा खर्च आहे. १२ जिल्ह्यांतील २७ हजार ५०० एकरांची जमीन हस्तांतरित होणार आहे.

शेतकरी (Farmer) भूमिहीन होणार असल्याने राज्यातील १२ जिल्ह्यांतील शेतकऱ्यांनी या शक्तिपीठ महामार्गाला विरोध सुरू केला आहे. चार वर्षांपासून रत्नागिरी-नागपूर महामार्गाचे (Ratnagiri-Nagpur Highway) काम सुरू आहे. अशातच राज्य सरकारने तीर्थ क्षेत्रे जोडण्यासाठी या नव्या शक्तिपीठ महामार्गाला मंजुरी दिली आहे. रत्नागिरी-नागपूर हा मार्ग असताना नवा मार्ग मागणीशिवाय मंजूर केला आहे.

१२ जिल्ह्यांतील १२ हजार ५८९ इतक्या गट नंबरमधील २७ हजार ५०० एकरांतून हा महामार्ग जाणार आहे. या सुपर एक्स्प्रेससेवेसाठी राज्य सरकार हजारो हेक्टर जमीन राष्ट्रीय महामार्ग रिअल इस्टेट कायद्यांतर्गत जमीन संपादित केली जात आहे. महामार्गाचे भूमिपूजन २०२५ मध्ये होणार असून, २०३० मध्ये खुला होणार आहे. नागपूरहून गोव्याला जाण्यासाठी रस्त्याने अठरा तास लागतात. शक्तिपीठ महामार्गाच्या निर्मितीनंतर हा प्रवास केवळ आठ तासांवर येणार असल्याचे कारण सांगून सरकार नवा मार्गा उभा करीत आहे.

दृष्टिक्षेपात मार्ग

जिल्हे- १२

(वर्धा, यवतमाळ, हिंगोली, नांदेड, परभणी, बीड, लातूर, धाराशिव, सोलापूर, सांगली, कोल्हापूर, सिंधुदुर्ग)

स्वरूप-६ पदरी

इंटरचेंज- २६ ठिकाणी

मोठे पूल- ४८

बोगदे- ३०

रेल्वे क्रॉसिंग-८

तीन शक्तिपीठे जोडणार

कोल्हापूर- अंबाबाई देवी

तुळजापूर- तुळजाभवानी

नांदेड- माहूरची रेणुकादेवी

महामार्गातील तीर्थक्षेत्रे

औंढा नागनाथ आणि परळी वैजनाथ ही दोन ज्योतिर्लिंग मंदिर

पंढरपूर श्री विठ्ठल रुक्मिणी मंदिर

नांदेड- गुरू गोविंदसिंग महाराजांचे गुरुद्वारा

सोलापूरचे सिद्धरामेश्वर मंदिर

सांगलीतील औदुंबर

कोल्हापूर - नृसिंहवाडी, पट्टणकोडोली, सांगवडे, कणेरी, आदमापूर