पालीनंतर आता मंगसुळीच्या खंडोबा मंदिरात पाहायला मिळणार 20 किलोचा खांडा; बनवण्यात 60 हजारांचा आला खर्च

सांगली : लाखो भाविकांचे श्रद्धास्थान असणाऱ्या कर्नाटक राज्यातील मंगसुळी (ता. कागवाड) येथील खंडोबा मंदिरात (Mangsuli Khandoba Mandir) देवाचे शस्त्र असणारा खांडा (तलवार) आता पाहायला मिळणार आहे. बेडग (ता. मिरज) गावचे शस्त्रसंग्राहक पृथ्वीराज पंडितराव माने-सरकार यांच्या संकल्पनेतून हा उपक्रम साकारत आहे. श्री. माने यांनी त्यांच्या नवसपूर्तीसाठी श्रावण महिन्यातील पहिल्या सोमवारी ती प्रदान केली जाणार आहे.

तीन धातूंपासून तयार केलेला हा खांडा मुंबईत बनवला गेला आहे. त्याची लांबी साडेचार फूट असून रुंदी अर्धा ते पाऊण फूट, तर वजन २० किलो आहे. तो बनवण्यासाठी सुमारे ६० हजार रुपये खर्च आला आहे. माने यांच्या संग्रहात तलवारी, भाले, वाड्याची मोठी कुलपे, पानपुडे, दांडपट्टा यांसह अन्य अनेक शस्त्रे आहेत.

खंडोबा चरणी खांडा अर्पण करण्याची परंपरा जुनी आहे. जेजुरीच्या खंडोबाचा खांडा जगप्रसिद्ध आहे. अनेक भाविक तो उचलण्याचा प्रयत्न करतात. त्याचे वजन ४२ किलो असून अनेक मान्यवर, सेलिब्रिटी खांडा हातात घेऊन त्यासोबत छायाचित्र काढताना दिसतात. पालीच्या खंडोबाला अर्पण केलेला खांडाही समारे १०५ किलो असल्याचे सांगितले जाते. मंगसुळी येथे अर्पण केला जाणारा २० किलोचा खांडा भक्तांना पाहायला मिळणार आहे.

देवस्थान ट्रस्टच्या कार्यालयात तो ठेवण्याची व्यवस्था करण्यात येणार आहे. श्रावण महिन्याच्या पहिल्या सोमवारी; म्हणजेच ५ ऑगस्ट रोजी सकाळी १० वाजता श्री खंडोबा चरणी अर्पण सोहळा होईल. विधिवत अभिषेक करून खांडा देवस्थानकडे अर्पण केला जाणार आहे. या सोहळ्यासाठी व खांडाचे दर्शन घेण्यासाठी येण्याचे आवाहन माने परिवाराने केले आहे.

प्रसिद्ध देवस्थानात मंगसुळी येथील खंडोबाची ओळख आहे. मात्र, देवाचे शस्त्र असणारा खांडा तेथे नसल्याची उणीव भासत होती. अन्य खंडोबा देवस्थानात तो प्रमुख आकर्षण असतो. दसऱ्यावेळी देवासमोर त्याचा मान असतो. त्यानुसार मंगसुळी येथील देवस्थानाला तो देण्याची इच्छा होती. ती आता पूर्ण होत असल्याचे मोठे समाधान आहे.

-पृथ्वीराज माने, शस्त्रसंग्राहक, बेडग (ता. मिरज)