Cow Milk : 'गोकुळ'नंतर राज्यातील खासगी-सहकारी दूध संघांकडून गाईच्या दूध दरात 'इतक्या' रुपयांची कपात

कोल्हापूर : गोकुळ दूध संघानंतर (Gokul Dudh Sangh) आता राज्यातील खासगी आणि सहकारी दूध संघांकडून खरेदी केल्या जाणाऱ्या प्रतिलिटर गाय दुधाच्या दरामध्ये २ रुपयांची कपात केली आहे. तर, म्हैस दुधाला प्रतिलिटर एक ते दीड रुपयांची वाढ जाहीर केली आहे.

१ ऑक्टोबरपासून ही दर कपात आणि वाढ ग्रहीत धरली जाणार आहे. सांगली येथे झालेल्या बैठकीत हा निर्णय घेण्यात आला. त्यामुळे उत्पादकांमध्ये पुन्हा एकदा नाराजी पसरणार आहे. देशात आणि राज्यात गाईच्या दुधाचे उत्पादन वाढले असून, मागणी घटली आहे. बटर आणि पावडरचे दर कमी झाले आहेत.

या पार्श्वभूमीवर राज्यातील खासगी आणि सहकारी दूध संघाकडून ही दर कपात जाहीर करण्यात आली आहे. यापूर्वी कोल्हापूर जिल्हा सहकारी दूध उत्पादक संघाने गाईच्या प्रतिलिटर दरामध्ये दोन रुपयांची कपात जाहीर केली होती. तर, म्हैस दुधासाठी प्रतिलिटर दीड रुपयांची वाढ केली आहे. राज्यातील गाय दुधाचे वाढते उत्पादन पाहता, पुरवठ्याएवढी मागणी होत नाही.

दरम्यान, गोकुळने दोन दिवसांपूर्वी म्हैस दुधाला प्रतिलिटर दीड रुपयांची वाढ देत गाय दुधात दोन रुपयांची कपात केल्यामुळे शेतकऱ्यांकडून संताप व्यक्त केला जात होता. यातच आता इतर सर्वच संघांनी दर कपात केल्यामुळे उत्पादकांच्या रागात आणखी भर पडणार आहे. बैठकीस श्रीपाद चितळे, किरीट मेहता, नेताजी पाटील, विशाल पाटील, शितल थोटे आदी प्रतिनिधी उपस्थित होते.