पेठवडगाव वारणा बझारमध्ये चोरी; सुमारे वीस लाख लंपास

पेठवडगांव - येथील वारणा बझारमध्ये अज्ञात चोरांनी लॉकर फोडुन सुमारे वीस लाख रुपये रोख रक्कम चोरुन नेले आहेत. चार वॉचमन असताना सुध्दा ही चोरी झाल्याने खळबळ उडाली आहे. ही घटना सोमवारी मध्यरात्री घडली.

वडगांव - लाटवडे रोडवर वारणा बझारची शाखा आहे. शनिवार व रविवारी बॅकांना सुट्टी असल्यामुळे जवळपासच्या बारा शाखांची रक्कम वडगांव शाखेतील दोन लॉकरमध्ये ठेवण्यात आली होती. दिपावलीमुळे खरेदीसाठी गर्दी असल्याने मोठी रक्कम होती. या शाखेतील तळमजल्यावर एक व पहिल्या मजल्यावर एक लॉकर आहे. यातील तळमजल्याच्या लॉकरमध्ये काही रक्कम ठेवल्यानंतर त्यामध्ये बसत नसल्यामुळे पहिल्या मजल्यावरील लॉकरमध्ये सुमारे बावीस लाख रुपये ठेवले होते. अज्ञात चोरांनी शाखेच्या पाठीमागच्या बाजुने पहिल्या मजल्यावर प्रवेश केला. एक सेंटीमीटर जाड असणारी लॉकर ग्राइंडरने कापून सुमारे वीस लाख रुपये चोरुन नेले. या लॉकरचे कुलुप निघाले नाही. परंतु दाराचा पतरा कापल्यामुळे एक फट तयार झाली. यामधुन ही चोरी केली. पण आतील अडीच लाख रुपये त्यांना काढता आले नाहीत. घटनास्थळी लॉकर कापल्याने लोखंडाची भुकटी सर्वत्र पडली होती.

चोरांनी चोरीची रेकी केली असावी. त्यांना दोन दिवसांची रक्कम कुठे असते हे माहीत होते. हा बझार रात्री आठच्या सुमारास बंद होतो. त्यानंतर नऊ वाजता कुलपे घातल्यानंतर किल्या अधिकाऱ्यांच्याकडे असतात. परंतु रात्रभर सभोवताली टेहळणीसाठी चार वॉचमन असतात असे असताना सुध्दा चोरी कशी झाली याबद्दल अाश्‍चर्य व्यक्त केले जात आहे.

लॉकर तोडताना वॉचमनला अावाज आला पाहिजे होता, तसे झाले नाही. यामुळे घटनेचे गुढ वाढले आहे. याबाबत पेठवडगांव पोलिस ठाण्यात गुन्हा दाखल झाला असुन तपास पोलिस निरीक्षक प्रदिप काळे करीत आहेत.