'मुख्यमंत्री साहेब, शाब्दिक धीराची गरज नाही तर...' - सदाभाऊ खोत

गुलाब चक्रीवादामुळे वेगाच्या वाऱ्यासह मुसळधार पाऊस झाला. या पावसाचा सर्वात मोठा फटका मध्य महाराष्ट्राला बसला आहे. मराठवाड्यात अतिवृष्टीमुळे शेतकऱ्यांच्या हातातोंडाशी आलेली पिके वाहून गेली, मात्र आम्ही सरकार म्हणून या शेतकऱ्यांच्या पाठीशी असून सर्वतोपरी मदत त्यांना करण्याचे निर्देश प्रशासनाला दिले असल्याचे मुख्यमंत्री उद्धव ठाकरे यांनी सांगितले आहे. त्यांच्या या प्रतिक्रीयेवरून शेतकरी नेते सदाभाऊ खोत यांनी ट्वीट करुन सवाल उपस्थित केला आहे.

ते म्हणतात, मुख्यमंत्री साहेब माझा माय बाप शेतकऱ्याला.. शाब्दिक धीराची आवश्यकता नाही, तर आता आर्थिक मदतीचा हात हवा आहे. तो कधी मिळेल ते सांगा? पावसामुळे शेतकऱ्याचे नुकसान झाले आहे. हातातोंडाशी आलीले पिकं रानात भुईसपाट झाली आहेत. त्यांना आर्थिक मदत कधी मिळणार ते सांगावे? असा सवाल त्यांनी केला आहे.

दरम्यान, गेल्या दोन दिवसांपासून मराठवाड्यात सुरू असलेल्या मुसळधार पावसाचा मुख्यमंत्र्यांनी मदत व पुनर्वसन विभागाकडून जिल्हानिहाय आढावा घेतला आहे. कोणत्याही परिस्थितीत बाधित शेतकरी, नागरिक यांना प्रशासनाने तातडीची मदत पोहचवावी असे निर्देश त्यांनी दिले होते. मुख्यमंत्र्यांनी विभागीय आयुक्तांशीही चर्चा केली असून या नैसर्गिक आपत्तीत प्रशासनाने नागरिकांच्या बचाव कार्यावर लक्ष द्यावे तसेच सर्व यंत्रणांत समन्वय ठेवावा असे सांगितले होते.