कडेगाव : येथील तहसील कार्यालयातील लाचखोर कारकून सुनील चव्हाण दहा हजारांची लाच घेताना जाळ्यात सापडला असला, तरी यातील मुख्य सूत्रधार मात्र नामानिराळे राहिले आहेत. तेव्हा याप्रकरणी लाचलुचपत प्रतिबंधक विभागाने सखोल चौकशी करून कडेगाव तहसील कार्यालयाला लागलेली लाचखोरीची कीड कायमची नष्ट करावी, अशी मागणी आता नागरिकांतून जोर धरू लागली आहे.
तत्कालीन मंत्री डॉ. पतंगराव कदम यांनी आपली राजकीय ताकद पणाला लावून कडेगावसारख्या दहा हजार लोकवस्तीच्या शहराला तालुक्याचा दर्जा मिळवून दिला. एवढ्यावरच न थांबता त्यांनी येथे नवीन इमारतीत तहसील कार्यालयासह सर्व शासकीय विभागाची कार्यालये सुरू केली. यामध्ये लोकांची कामे तत्काळ मार्गी लागावीत, त्यांच्या वेळेची व पैशांची बचत व्हावी, असा त्यांचा हेतू होता.
यापैकी तहसील कार्यालयाचे कामकाज सातत्याने वादाच्या भोवऱ्यात अडकल्याचे चित्र पाहायला मिळत आहे. येथे कागदावर ‘वजन’ ठेवल्याशिवाय कागद पुढे सरकत नाही, असे नागरिकांतून उघडपणे बोलले जात आहे. अशा रीतीने तहसिल कार्यालयातील लाचखोरी काही थांबायचे नाव घेत नसून येथे वारंवार लाचखोरीची प्रकरणे घडत आहेत. त्यामुळे नागरिकांतून संतप्त प्रतिक्रिया उमटू लागल्या आहेत. याप्रकरणी लाचलुचपत प्रतिबंधक विभाग कारवाई करीत आहे. परंतु आतापर्यंत येथील मुख्य सूत्रधारावर कधी कारवाई झालीच नाही. त्यामुळेच अनेकवेळा कारवाई होऊनही येथील लाचखोरीची कीड कायमची नष्ट होत नसल्याचे बोलले जात आहे. तेव्हा वरिष्ठ महसूल अधिकाऱ्यांनी याची गंभीर दखल घेऊन येथील मुख्य सूत्रधारासह लाचखोरांवर कठोर कारवाई करावी व येथील लाचखोरीची कीड कायमची संपवावी,अशी मागणी नागरिकांतून जोर धरू लागली आहे.
सत्ताधारी-विरोधकांची गांधारीची भूमिका
कडेगाव तहसील कार्यालयात लाचखोरीची मालिका सुरू आहे. असे असताना वरिष्ठ महसूल अधिकाऱ्यांसह सत्ताधारी व विरोधकांनीही घेतलेल्या गांधारीच्या भूमिकेबद्दल तालुक्यातील सर्वसामान्य नागरिकांतून आश्चर्य व्यक्त होत आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.