'ती सध्या काय करते...'  म्हणत ते धावले मदतीला 

वांगी (सांगली) : मैत्रीची व्याख्या वॉटस्‌अप चाटिंग, शेअरिंग आणि लाईकच्या कुंपणात बंदिस्त झाल्यासारखे वाटत असताना काही लोकांनी मात्र जुन्या आठवणींचे धागे काही ना काही निमित्ताने घट्ट करण्याचा प्रयत्न चालू ठेवला आहे. असाच एक प्रयत्न वांगी (ता. कडेगाव) येथे झाला. सन 1994 मध्ये दहावीत शिकणारी "ती सध्या काय करते', या प्रश्‍नाच्या उत्तरात तिची आर्थिक समस्या दडली होती. त्या समस्येला भिडताना तिच्यासोबत त्याकाळी शिकणाऱ्यांनी मदतीचा हात पुढे केला आणि चक्क तिच्या मुलीच्या लग्नासाठीचा संपूर्ण संसार सेट त्यांनीच खरेदी करून दिला. 

जुन्या आठवणींना उजाळा मिळाला.

वांगी (ता. कडेगाव) न्यू इंग्लिश स्कूलच्या 1994 च्या बॅचमधील शालेय सवंगड्यानी हा आदर्श घालून दिला. पितृछत्र हरपलेल्या मुलीच्या पाठीशी खंबीर माणसे उभी राहिली आणि तिची आई भारावून गेली. या कुटुंबीयांसह उपस्थितांच्या डोळ्यांत आनंदाश्रू उभे राहिले. शालेय शिक्षण पूर्ण करून सारेच जीवनात स्थिर झालेत. व्यापात बुडालेत, मात्र शाळेच्या आठवणी जाग्या होतात तेव्हा सारे मागे सोडून एक पाऊल पुढे पडते. त्यातूनच स्नेहमेळावा ठरला. 1994-95 च्या दहावी बॅचने आयोजित केला. इतक्‍या वर्षांनंतर एकमेकांना भेटल्या नंतर जुन्या आठवणींना उजाळा मिळाला. त्यात कोण काय करते, यावर चर्चा झाली. 

हेही वाचा - रेल्वेचे जनरल तिकीटही काढणे झाले सोपे; त्यासाठी हे करा

वर्गातील एक सहकारी मुलीवर सध्या आभाळ कोसळले असल्याची बातमी त्यातूनच पुढे आली. लहानपणीच पित्याचे छत्र हरवलेली मुलगी मामाच्या घरी मोठी झाली. तिचा विवाह संपन्न झाला. मात्र नियतीने तिच्यावर आघात केला. तिच्या मुलीच्या लग्नासाठी आता आर्थिक अडचण आहे, ही माहिती पुढे आली. तेव्हा या सर्वांनी मदत म्हणून तीस हजार रुपये जमा केले. सर्व संसारसेट भेट स्वरूपात दिला. 

क्लिक करा - धक्कादायक ! मित्राला फॅक्टरी काढण्यासाठी केलेली मदत बेतली जिवावर
 

या मित्रांची एकी 

ऍड. महेंद्र देशमुख, प्रकाश सूर्यवंशी, राहुल साळुंखे, सतीश सूर्यवंशी, अधिक कांबळे, नारायण चव्हाण, सचिन शिर्के, प्रवीण सूर्यवंशी, अर्जुन कुंभार, अनिल जठार, बापूसाहेब मोकळे, कृष्णत मोकळे, सुरेश सूर्यवंशी, विकास शंकर सूर्यवंशी, उमेश कुलकर्णी, संदीप रास्कर, संतोष पवार, किरण सूर्यवंशी, शैलेंद्र क्षीरसागर, सुरेश चव्हाण, सुजाता माळी, आशारणी मोहिते, मनीषा मोहिते, शाहीन शिकलगार, सुरेखा मोहिते, वैशाली वाघमोडे, सुषमा दाईगडे, मनीषा चव्हाण, रेखा होनमाने, आशाराणी सरोदे, वंदना पवार.