सांगली : परतीच्या पावसामुळे काढणी खोळंबली

सांगली : शिराळा तालुक्यात रोज रोज पडणाऱ्या परतीचा पावसामुळे खरीप हंगामातील पिकांची काढणी खोळंबली असून पिकांचे मोठ्या प्रमाणात नुकसान झाले आहे. कापणीला आलेले भाताचे पीक कोलमडून पडले असून शेतात पाणी साचल्याने काही ठिकाणी भातपिकास मोड आले आहेत. जुलै-ऑगस्ट महिन्यात झालेल्या अतिवृष्टी व महापुरामुळे अगोदरच वारणा नदीकाठावरील खरीप कुजून गेला. त्यातून उरला सुरलेला नदीकाठचा परिसर वगळता शेतशिवरतील खरीप काढणीला आला असून परतीच्या पावसामुळे त्याची देखील धूळधाण झाली आहे. भात पीक जमीनदोस्त झाले तर भुईमुंगाच्या शेंगांना मोड आले आहेत. यामुळे शेतकऱ्यांच्या हाता-तोंडाशी आलेला घास वाया जात असल्याने शेतकरी हवालदिल झाला आहे. भातशेती धरणीला टेकली असून, भात उत्पादक शेतकऱ्यांचे मोठे नुकसान झाले आहे.

भात शेतीचे आगार म्हणून संबोधल्या जाणाऱ्या शिराळा पश्चिम भागात सध्या भात, भुईमूग, सोयाबीन आदी पिकांची काढणी सुरू असून रोज पडणाऱ्या पावसामुळे ती खोळंबली आहे. भातपीक काढण्याचा हंगाम उलटला तरी परतीच्या पावसाने भात पिकावर पाणी फिरवले. ढगफुटीसदृश पावसामुळे शेतात उभं असलेल्या भात पिकांची धूळधाण झाली आहे. शेतकऱ्यांना पिके काढता येत नसल्याने शेतकरी वर्गाचे मोठे नुकसान होणार आहे. अगोदर अतिवृष्टी व आता परतीचा पाऊस यामुळे शेतकरी दुहेरी संकटात सापडला आहे. ऐन काढणीच्या मोसमात आलेली पिके परतीच्या पावसाने गेल्याने शेतकरी वर्गाचे मोठे नुकसान होणार आहे.

अतिवृष्टी व महापुरामुळे नुकसान झालेल्या शेतकऱ्यांना अद्याप भरपाई मिळाली नसल्याने आता पुन्हा परतीच्या पावसामुळे नुकसान झालेल्या शेतकऱ्यांना भरपाई मिळणार का ? असा प्रश्न शेतकरी वर्गातून विचारला जात आहे. पीक कुजून जाण्याच्या मार्गावर तालुक्यात १२ हजार ९०० हेक्टरवर खरिपाची पेरणी करण्यात आली होती. त्यातील साधारणपणे ६ हजार ५०० हेक्टर वरील खरीप महापुरामुळे अगोदरच कुजून गेला आहे. साधारणपणे ९० ते १२० दिवसांचे असणारे भात पीक अजूनही शेतातच असून तेही कुजून जाण्याच्या मार्गावर आहे.