कलेक्‍टर साहेब कितीदा काढायचा पास?

मायणी (जि. सातारा) : दैनंदिन गरजा भागविण्यासाठी जिल्ह्यांच्या सीमावर्ती भागातील नागरिकांना वारंवार जिल्हा हद्दी ओलांडून ये- जा करावी लागते. त्यामुळे ऑनलाइन पास काढण्याऐवजी स्थानिकांना आधारकार्ड, ओळखपत्र वा अन्य पुराव्याच्या आधारे शेजारील गावांत ये-जा करण्याची मुभा मिळावी अशी मागणी होत आहे. 

कोरोनाच्या पार्श्वभूमीवर सर्व जिल्हा हद्दी बंद केल्यात. रहदारीच्या मार्गावर ठिकठिकाणी चेक पोस्ट आहेत. तर अनेक रस्ते बंद केले आहेत. सीमाभागातील गावांना जोडणारे छोटे मोठे रस्ते व चोरवाटाही बंद केल्या आहेत. त्यासाठी रस्त्यांवर डबर, काटेरी झाडेझुडपे टाकली आहेत. चेकपोस्टवर पोलिसांचा खडा पहारा आहे. आदेशाची काटेकोरपणे अंमलबजावणी केली जात आहे. वाहने अडवून सर्वांगीण चौकशी केली जात आहे. विहीत पासाची मागणी करण्यात येत आहे. त्याची आवश्‍यकताही आहे. कोरोनाचा प्रादुर्भाव, फैलाव रोखण्यासाठी तशी खबरदारी घ्यायलाच हवी. मात्र सीमाभागातील अनेक लोकांना शेजारील परजिल्ह्यातील गावांत दैनदैन गरजा भागविण्यासाठी वारंवार जावे लागते. 

किराणा माल, भाजीपाला, पिठाची गिरणी, मेडिकल स्टोअर्स, वैद्यकीय सुविधा, शेतीमालाची खरेदी विक्री, खते, औषधे, बी-बियाणे, बॅंकांतील कामे, पेट्रोल- डिझेल भरणे अशा अनेक कामांसाठी सीमेबाहेरील गावांत येजा करावी लागते. मात्र ऑनलाईन पासअभावी अडचणी येतात. पास काढण्याची सोयही खेड्यापाड्यात नाही. मग कसा, कुठून आणि कितीवेळा पास काढायचा, असा सवाल नागरिक करीत आहेत. त्यासाठी कलेक्‍टर साहेबांनी केवळ सीमाभागातील नागरिकांसाठी अन्य पर्याय द्यावा. तास- दोन तासांच्या कामासाठी स्थानिकांना पासाची सूट द्यावी. त्याऐवजी त्यांचे आधारकार्ड, ओळखपत्र, रहिवासाचा पुरावा पाहुन ये जा करण्याची मुभा द्यावी. तसेच, शाळांचे मुख्याध्यापक व काही अन्य कार्यालय प्रमुख हे शेजारील जिल्ह्यात सीमाभागातील गावांत राहण्यास आहेत. कार्यालयीन कामांसाठी त्यांना वरचेवर हद्द ओलांडून ये- जा करावी लागते. अशा कार्यालय प्रमुखांनाही चेक पोस्टवरुन आवश्‍यक ते ओळखपत्र वा कार्यालयीन पुरावा पाहुन ये-जा करण्याची मुभा देण्याची आवश्‍यकता आहे. 

मायणीलगतच्या परंतु सांगली जिल्ह्यातील माहुली, वलखड, भिकवडी आदी गावांतील लोकांना बाजारहाटासाठी येथेच यावे लागते. शेती मालाची खरेदी-विक्री, बी-बियाणे, खते, औषधे, आरोग्य सुविधा आदीसाठी अन्य पर्याय नाही.

तसेच सातारा जिल्ह्यातील मायणीसह चितळी, विखळे, कलेढोण, पाचवड, म्हासुर्णे, निमसोड (ता. खटाव) परिसरातील लोकांना सोनोग्राफी, एक्‍सरे, महत्वाची औषधे, तज्ञ डॉक्‍टरांची वैद्यकीय सेवा, धान्यबाजार आदीसाठी विटा (जि. सांगली) येथील बाजारपेठेत जावे लागते. त्यामुळे वारंवार पास काढणे शक्‍य होत नाही. म्हणूनच लोक कलेक्‍टर साहेबांना साकडे घालत आहेत. स्थानिकांना महत्वाच्या कामांसाठी पासाशिवाय ये-जा करण्याची मुभा देण्याची मागणी होत आहे 

सातारा : रात्रीच्या जाेरदार बॅटिंगनंतर पावसाची रिपरिप सुरुच