दुभत्या जनावरांत पसरतोय लाळ खुरकुत!

निपाणी : लाळ खुरकुत आजाराने दुभती जनावरे आजारी असल्याने त्याचा परिणाम दुग्ध उत्पादनावर होत आहे. हा संसर्गजन्य आजार असल्याने निपाणी तालुक्यातील गो-पालकांमध्ये चिंता निर्माण झाली आहे.

प्रतिकारशक्ती कमी असलेल्या जनावरांना लाळ खुरकुत आजाराची लागण होते. पायात त्राण नसल्याने त्रास होऊन चालताना लंगडावे लागते. तोंड आल्यामुळे चारा, वैरण खाता येत नाही. यात अनेक खासगी उपचारही गो-पालक करत आहेत. निपाणी तालुक्यातील काही भागातील शेतकऱ्यांची जनावरे या आजाराने त्रस्त आहेत. दुभत्या जनावरांच्या दुधावर परिणाम होत असल्याने दुग्ध व्यवसाय करणाऱ्या शेतकऱ्यांना आर्थिक झळ बसत असल्याचे चित्र दिसत आहे.

लसीकरण महत्त्वाचे

लस देण्यात न आलेल्या जनावरांचा आजार बळावत आहे. निपाणी तालुक्यात अनेक ठिकाणी लस उपलब्ध नसल्याचे चित्र आहे. हा आजार टाळण्यासाठी त्वरित जनावरांना लसीकरण करावे, अशी मागणी गो-पालपाकातून होत आहे.

'लाळ खुरकुत हा संसर्गजन्य आजार आहे. यामुळे दुसऱ्या जनावरांना त्याची बाधा होऊ न देण्यासाठी खबरदारी घ्यावी. औषधोपचाराने हा आजार पूर्णपणे बरा होतो. त्यामुळे शेतकऱ्यांनी घाबरू नये.'

-डाॅ. जे. ए. कंकणवाडे,

तालुका पशुवैद्यकीय अधिकारी, निपाणी

अशी घ्या खबरदारी...

• लाळ खुरकुत हा संसर्गजन्य आजार आहे.

• त्या जनावरांना इतर जनावरांपासून दूर ठेवावे.

• पशुवैद्यकांकडून औषधोपचार करून घ्यावा.

• कोथिंबीर खाऊ घाला, लाळ खुरकत कमी होते.

• बडीशेपेचे पाणी पाजावे.

• जखम भरण्यासाठी त्या स्वच्छ करून औषधोपचार करावेत.