अक्कलकोटमध्ये शेतीच्या बांधावरुन ६० वर्षीय व्यक्तीचा खून! कुऱ्हाडीचे ४ घाव, पण डोक्यातील घावाने घेतला जीव; तिघांवर गुन्हा, दोघांना सोमवारपर्यंत पोलिस कोठडी

सोलापूर : शेतीचा बांध टोकरण्यावरुन झालेल्या मागील भांडणाच्या रागातून व नेहमीच्याच किरकिरीमुळे किरनळ्ळीच्या (ता. अक्कलकोट) शिवारातील शेताच्या शेजारील सुरेश सिद्धाराम कोतले, सिद्धाराम सुरेश कोतले, संगिता सिद्धाराम कोतले (तिघेही रा. घोळसगाव, ता. अक्कलकोट) यांनी शशिकांत पांडुरंग कोळेकर (वय ६०, रा. किरनळ्ळ) यांचा कुऱ्हाडीचा घाव घालून खून केला. या प्रकरणी तिघांविरुद्ध अक्कलकोट उत्तर पोलिसांत गुन्हा दाखल झाला असून त्यातील सिद्धाराम कोतले व संगिता कोतले यांना न्यायालयाने सोमवारपर्यंत (ता. २५) पोलिस कोठडी ठोठावली आहे.

मयत शशिकांत कोळेकर यांच्या शेताशेजारी संशयित आरोपी कोतले यांचीही शेती आहे. सुरेश कोतले, सिद्धाराम कोतले हे सतत शेतीचा बांध टोकरतात, अशी तक्रार कोळेकर यांची होती. यातूनच २०२० मध्ये मयताचा भाऊ नागनाथ कोळेकर यांनी सुरेश कोतले यांना मारहाण देखील केली होती. या प्रकरणी पोलिसांत गुन्हा देखील दाखल आहे. त्यानंतर सर्वकाही शांत झाले होते, पण बांध कोरत असल्याचा संशय मयत व मयताच्या भावाला होता. मंगळवारी (ता. १९) दुपारी चारच्या सुमारास मयत शशिकांत कोळेकर हा शेळ्या चारायला स्वत:च्या शेताकडे गेला होता. त्यावेळी बांधाजवळ जावून संशयित आरोपींकडे पाहत होता. त्यातून त्या तिघांनी शशिकांत कोळेकर यांच्यावर कुऱ्हाडीने हातावर दोन, छातीवर एक आणि डोक्यात एक, असे चार घाव घाव घातल्याचे फिर्यादीचे म्हणणे आहे. त्यातील डोक्यातील घाव जोरात बसला आणि त्यातच शशिकांत कोळेकर यांचा मृत्यू झाला.

या प्रकरणी मयताचा भाऊ नागनाथ कोळेकर यांनी अक्कलकोट उत्तर पोलिसांत तिघांविरुद्ध फिर्याद दिली. पोलिस उपअधीक्षक विलास यामावर, वरिष्ठ पोलिस निरीक्षक राजेंद्र टाकणे यांनी तत्काळ घटनास्थळी धाव घेतली. तत्काळ संशयित आरोपींना अटक करण्यात आली. पण, सुरेश कोतले वयस्कर तथा वैद्यकीयदृष्ट्या अनफिट असल्याने त्याला अटक केलेली नाही. त्याचा मुलगा व सूनेला अटक केली असून सध्या ते पोलिस कोठडीत असल्याचे पोलिसांनी सांगितले.

रागाने बघतोय म्हणून कुऱ्हाडीने घाव

शेतात शेळ्या चारायला आलेले मयत शशिकांत कोळेकर यांनी संशयित आरोपींकडे रागाने पाहिले. सतत रागाने पाहतोय म्हणून सिद्धाराम कोतले व त्याची पत्नी संगिता शशिकांत यांच्याकडे केले. शब्दाने शब्द वाढत गेला आणि सिद्धारामने त्याच्याकडील कुऱ्हाडीने शशिकांतवर घाव घातले. त्यातच त्यांचा मृत्यू झाल्याचे फिर्यादीने पोलिसांना सांगितले.