टेंभुर्णी (सोलापूर) : भिवंडी येथे चार मिनार सिगारेटचे बॉक्स घेऊन जाणारा टेम्पो आडवून सहा ते सात दरोडेखोरांनी चालक व त्याच्या सोबतच्या एका व्यक्तीला शिवीगाळ, दमदाटी व मारहाण करून टेम्पोमधील 99 लाख 37 हजार 175 रूपये किंमतीचे चार मिनार सिगारेटचे 250 बॉक्स जबरदस्तीने चोरून नेले. सोलापूर-पुणे महामार्गावर टेंभुर्णी शहराच्या पश्चिमेस अंदाजे दोन ते तीन किलोमीटर अंतरावर ही घटना सोमवारी (ता. 20) सायंकाळी साडेसात ते पावणेआठ वाजण्याच्या दरम्यान घडली. याप्रकरणी टेंभुर्णी पोलिस ठाण्यात मंगळवारी (ता. 21) रात्री उशिरा गुन्हा दाखल झाला आहे.
टेम्पो मालक मोहम्मद इम्तियाज मोहम्मद मुमताज (वय 38, रा. बंजाराहिल्स गुरूब्रम्हानगर, हैद्राबाद) याने हैद्राबाद येथील चार मिनार सिगारेट कंपनीतून टेम्पो (एपी 22/टीए 2972)मध्ये 250 बॉक्स सिगारेट घेऊन भिवंडी येथे पोहच करण्यासाठी सोमवारी सकाळी निघाला होता. त्याच्या सोबत मोहम्मद इस्माईल हुसेन (रा. हाफीस पेठ, हैद्राबाद) हा दुसरा टेम्पो मालक त्याचा वाशी येथील टेम्पो आणण्यासाठी आला होता.
सायंकाळी साडेसात ते पावणेआठ वाजण्याच्या दरम्यान टेंभुर्णी येथील नगरकडे जाणारा पुल ओलांडून टेम्पो दोन ते तीन किलोमीटर अंतरावर गेला असता दोन कार सोबत जात होत्या. त्यावेळी मागून आलेल्या ट्रकने टेम्पोला दुभाजकाकडे दाबले. त्यामुळे चालकाने टेम्पो थांबविला. त्यावेळी मागून आलेल्या सहा ते सात दरोडेखोरांनी टेम्पोजवळ येऊन चालक व सोबत असलेल्या व्यक्तीला मारहाण व शिवीगाळ करून दोघांच्या डोळ्यावर पट्टी बांधली. त्यानंतर हातपाय बांधून त्यांच्याच टेम्पोत बसवून टेम्पो पुढे घेऊन गेले.
चार ते पाच किलोमीटर अंतरावर गेल्यावर त्या दोघांना टेम्पोतून खाली घेऊन रस्त्याने चालत अज्ञात ठिकाणी घेऊन गेले. दोन ते अडीच तासानंतर चालकाला अज्ञात ठिकाणी सोडून ते निघून गेले. काही वेळाने हातपाय व डोळ्यावर बांधलेली पट्टी सोडली. त्यानंतर टेम्पोचा शोध घेतला असता इंदापूरच्या पुढे महामार्गावर टेम्पो सोडून चार मिनार सिगारेटचे 250 बॉक्स घेऊन दरोडेखोर पसार झाले होते. भीमानदीजवळच्या सरदारजी ढाब्यावर चालक आला. त्यावेळी टेंभुर्णी पोलिस तेथे आले होते. त्यांना टेंम्पो चालकांनी घडलेली घटना सांगितली. या प्रकरणी टेंम्पो चालक मोहम्मद इम्तियाज मोहम्मद मुमताज याने फिर्याद दिली आहे. तपास पोलीस निरीक्षक सुरेश निंबाळकर करीत आहेत.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
