डोक्‍याला हात लावून बसण्याची आली शेतकऱ्यांवर वेळ ! कारण, आता उसापाठोपाठ "याला'ही झालाय हुमणीचा प्रादुर्भाव 

मोहोळ (सोलापूर) : शेतकऱ्यामागची संकटांची मालिका संपता संपेना. उत्पादित शेतमालाचे तसेच पालेभाज्या व फळभाज्यांचे दर कोसळले आहेत. उत्पादित केलेला माल बाजारपेठा बंद असल्याने विकता येईना, त्यामुळे शेतकरी आता सीताफळ, पेरू यांसारख्या बागा लागवडीकडे वळला आहे. मात्र, आता लागवड केलेल्या पेरूच्या बागेलाही हुमणीचा प्रादुर्भाव झाल्याने डोक्‍याला हात लावून बसण्याची वेळ शेतकऱ्यावर आली आहे. 

हेही वाचा : पत्नीच्या मृत्यूनंतर दोन तासात पतीचाही मृत्यू; दहा तासात एकाच गावातील तिघांचे निधन 

शिरापूर (ता. मोहोळ) येथील संतोष व लक्ष्मण शिवाजी शिंदे या सख्ख्या भावांनी पेरू बागेची लागवड केली आहे. इतर डाळिंब, द्राक्ष यांसारख्या खर्चिक बागा करण्याची अनेक शेतकऱ्यांची आर्थिक परिस्थिती नाही, त्यामुळे सीताफळ, पेरू यांसारख्या कमी खर्चाच्या बागा लागवडीकडे शेतकऱ्यांचा वाढता कल आहे. शिंदे या शेतकऱ्याने पेरू लागवडी अगोदर जमिनीत शेणखत घातले आहे. लागवड केल्यानंतर काही दिवसांनी अंतर मशागती वेळी अनेक हुमणीच्या अळ्या जमिनीतून वर येऊ लागल्या असल्याचे त्यांच्या लक्षात आले. दररोज सुमारे पाच ते सहा पाट्या हुमणीच्या अळ्या वेचल्या तरीही त्या कमी होईनात. लागवड केलेल्या पेरूच्या रोपांची मुळे हुमण्या कुरतडू लागल्याने रोपे जळून चालली आहेत. शिंदे हे नवीन शेतकरी आहेत. अनेक नव्या शेतकऱ्यांना अशा संकटाशी सामना करावा लागत आहे. कृषी विभागाने तातडीने याबाबत शेतकऱ्यांना मार्गदर्शन करण्याची गरज आहे. 

हेही वाचा : बार्शी तालुक्‍यात कोरोनाबाधित रुग्णांवर उपचार करणाऱ्या "या' बोगस डॉक्‍टरवर अखेर गुन्हा दाखल ! काय आहे प्रकरण? वाचा 

याबाबत शिरापूरचे शेतकरी लक्ष्मण शिंदे म्हणाले, आम्ही एक एकर जमिनीवर पेरूची लागवड केली आहे. मात्र पेरूच्या रोपाला हुमणी लागली आहे. आटोक्‍यात येता येईना. दररोज घरातील सर्व सदस्य हुमणी वेचण्याचे काम करतात. या अनाहुत संकटाने माझ्यासारख्या शेतकऱ्याचे खच्चीकरण झाले आहे. 

संपादन : श्रीनिवास दुध्याल