Akshaya Tritiya 2024 : फळांच्या राजाची पंढरीत आवक; अक्षय तृतीयेच्या मुहूर्तावर खरेदीस गर्दी

पंढरपूर : साडेतीन मुहूर्तांपैकी अर्धा मुहूर्त असलेल्या अक्षय तृतीयेचा सण यंदा शुक्रवारी (ता. १०) साजरा होणार आहे. अक्षय तृतीयेसाठी येथील कृषी उत्पन्न बाजार समितीमध्ये बुधवारी (ता. ८) सुमारे चारशे ते साडेचारशे क्रेट केशर आंब्याची आवक झाली आहे. या सणासाठी आंब्याला मोठी मागणी असल्यामुळे फळांचा राजा आंबा बाजारामध्ये भाव खात असल्याचे चित्र दिसून आले.

अक्षय तृतीयेपासून आंबा खाण्याचा प्रघात असल्याने हा सण साजरा करण्यासाठी घरोघरी आमरस पुरीचा बेत केला जातो. यंदा शुक्रवारी अक्षय तृतीया आहे. या निमित्ताने येथील कृषी उत्पन्न बाजार समितीच्या आवारामध्ये आज सुमारे चारशे ते साडे चारशे क्रेट केशर आंब्याची आवक झाली होती. आज झालेल्या लिलावामध्ये किरकोळ विक्रेत्यांनी आंबा चढाओढीने खरेदी केला.

लिलावामध्ये प्रतवारीनुसार केशर आंब्याचे दर १०० ते १५० रुपये प्रतिकिलो होते. केशर आंब्याबरोबरच कर्नाटक व तेलंगण राज्यातील तोतापुरी, बदाम, मल्लिका, लालबाग, कर्नाटकी हापूस आंब्याची देखील काही प्रमाणात आवक झाली होती. किरकोळ विक्रेत्यांनी लिलावामध्ये खरेदी केलेला आंबा येथील नवी पेठ भाजीबाजारामध्ये विक्री केला जात आहे.

नवीपेठ बाजारामध्ये केशर आंबा १५० ते २०० रुपये, लालबाग १०० ते १५० रुपये, बदाम ८० ते १०० रुपये, मल्लिका १२० ते १५० रुपये, कर्नाटक हापूस १२० ते १५० रुपये तर तोतापुरी ६० ते ८० रुपये प्रतिकिलोप्रमाणे विक्री केला जात होता. अक्षय तृतीयेसाठी आंब्याला मोठी मागणी असल्यामुळे आज बाजारामध्ये फळांचा राजा आंबा भाव खात असल्याचे चित्र दिसून आले.

साडेतीन मुहूर्तांपैकी अक्षय तृतीयेचा मुहूर्त

वैशाख शुद्ध तृतीयेला अक्षय तृतीया असे म्हणतात. ग्रामीण भागामध्ये अक्षय तृतीयेला आखिती असे देखील म्हणतात. अक्षय तृतीया हा साडेतीन मुहूर्तापैकी अर्धा मुहूर्त आहे. गुढीपाडवा, बलिप्रतिपदा (पाडवा), दसरा आणि अक्षय तृतीया हे साडेतीन मुहूर्त आहेत. अक्षय तृतीयेचे औचित्य साधून नागरिक सोने-चांदी, वाहने, घर, गृहोपयोगी वस्तू, इलेक्ट्रॉनिक्स उपकरणे आदींची खरेदी करतात. या दिवशी अनेक शुभ कार्यांचा प्रारंभ केला जातो.