बायोमेट्रिक हजेरी बंद ! विद्यापीठ अनुदान आयोगाचे पत्र 

सोलापूर : चीनमधील कोरोना या विषाणूचा प्रसार आता जगभर झाला असून महाराष्ट्रातील पुणे, मुंबईत या आजाराचे रुग्ण आढळले आहेत. या विषाणूचा प्रसार टाळण्याच्या निमित्ताने सर्वच शासकीय कार्यालयांमधील बायोमेट्रिक हजेरी बंदचा निर्णय महाविकास आघाडी सरकारच्या विचाराधीन आहे. तत्पूर्वी, विद्यापीठ अनुदान आयोग व शिक्षण संचालनालयाने सर्व विद्यापीठांमधील बायोमेट्रिक हजेरी अनिश्‍चित कालावधीसाठी बंद ठेवावी, असे आदेश दिले आहेत. 

हेही नक्‍की वाचा : 'कोरोना'वर उपाय ! रुग्णांना स्वाईन फ्ल्यूची लस 

कोरोना हा संसर्गजन्य आजार असून त्या विषाणूंचा झपाट्याने प्रसार वाढू लागला आहे. तो प्रसार टाळण्यासाठी बायोमेट्रिक हजेरी बंद करून हजेरीच्या नोंदी हजेरीपत्रकावर मॅन्युअली घ्याव्यात, असे पत्र विद्यापीठ प्रशासनाला दिले आहे. विद्यापीठ अनुदान आयोगाने 5 मार्चला तर उच्च शिक्षण विभागाच्या विभागीय सहसंचालकांनी 11 मार्चला विद्यापीठांना आदेश दिले आहेत. तत्पूर्वी, राज्यातील सोलापूरसह अन्य काही महापालिकांसह अन्य शासकीय कार्यालयांमधील बायोमेट्रिक हजेरी बंद करण्यात आली आहे. विद्यापीठांमध्ये होणारे सार्वजनिक कार्यक्रमही पुढे ढकलावेत, गरज भासल्यास मास्कचा वापर करावा, अशा सूचनाही करण्यात आल्या आहेत. विद्यापीठ प्रशासनाने विद्यार्थ्यांची नियमित काळजी घ्यावी, असे सांगितले आहे. 

हेही नक्‍की वाचा : खासदार डॉ. महास्वामींना 8 एप्रिलपर्यंत न्यायालयाचा दिलासा 

हजेरी पुस्तकांवर स्वाक्षरी व परिसरात सीसीटीव्ही 
कोरोना या विषाणूजन्य आजाराच्या रुग्णांची संख्या महाराष्ट्रात 15वर पोचली आहे. या पार्श्‍वभूमीवर राज्याच्या शिक्षण विभागाने खबरदारी म्हणून विद्यापीठांमधील बायोमेट्रिक हजेरी बंद करण्याचा निर्णय घेतला आहे. आता पुढील आदेश होईपर्यंत प्राध्यापक, अधिकारी, शिक्षकेतर कर्मचाऱ्यांना हजेरीपत्रकावर स्वाक्षरी करावी लागणार आहे. दरम्यान, कर्मचाऱ्यांकडून या निर्णयाचा गैरफायदा घेतला जाऊ नये म्हणून त्या परिसरात सीसीटीव्ही कॅमेरे बसविण्यात येणार आहेत. पाच दिवसांचा आठवडा जाहीर झाल्यानंतर सर्वच शासकीय कार्यालयांमध्ये बायोमेट्रिक बसविणे बंधनकारक करण्यात आले होते. मात्र, कोरोनामुळे आता या निर्णयाला तात्पुरती स्थगिती देण्याचा निर्णय झाला आहे.