ठाकरे-पवार सरकार म्हणजे 'अलीबाबा चाळीस चोर' : किरीट सोमय्या

सांगोला (सोलापूर) : ठाकरे-पवार सरकार म्हणजे अलीबाबा चाळीस चोराचे घोटाळेबाज सरकार आहे. हे सरकार महाराष्ट्राला (Maharashtra) लुटण्याचे काम करीत आहे. सांगोला साखर कारखान्यासह घोटाळ्यांची प्रकरणे आपल्याकडे आली असून, या सर्व घोटाळ्यांचा पाठपुरावा आपण करणार आहोत, असे भाजपचे (BJP) माजी खासदार किरीट सोमय्या (Kirit Somayya) यांनी सांगोला (Sangola) येथे पत्रकार परिषदेत बोलताना सांगितले.

सांगोला येथील हॉटेल अँबेसिडर येथे भाजपच्या कार्यकर्त्यांची बैठक घेऊन या वेळी सोमय्यांनी बैठकीत मार्गदर्शन केले. त्यानंतर त्यांनी पत्रकारांशी संवाद साधला. किरीट सोमय्या पुढे बोलताना म्हणाले की, गेल्या 23 महिन्यांत 24 घोटाळे बाहेर काढले असून, या सर्वांवर सध्या कारवाई सुरू आहे. महाराष्ट्रातील अनेकांच्या चौकशा सध्या सुरू आहेत. अनेक मंत्री सध्या चौकशीच्या फेऱ्यात अडकले आहेत. सध्याच्या ठाकरे सरकारचे माजी गृहमंत्री फरार आहेत, कमिशनर परदेशात गेले आहेत, पोलिस अधिकारी अटकेत आहेत. हे सरकार आहे की माफिया आहे, असा प्रश्‍न करून, अनेक नेत्यांनी कारखाने लुटण्याचे काम केले असून, पवारांच्या घरात सर्वांचीच बेनामी मालमत्ता आहे. यासंदर्भातही आपण आवाज उठवत आहोत.

आता क्रांतीची सुरवात झाली आहे. महाराष्ट्रातील जनतेला जागृत करण्याचे काम भाजप करत असून हजारो कोटींचे घोटाळे करणाऱ्यांना पाठीशी घालण्याचे काम ठाकरे सरकार करत आहे. मात्र, आता लवकरच अलिबाबा आणि चाळीस चोरांना व घोटाळेबाज सरकारला घरी पाठवण्याचे काम भाजप करणार असल्याचे किरीट सोमय्या यांनी सांगितले.